香港賽馬討論區 - 好爸爸元旦日上陣！賽馬世界

29/12/2012 06:33 PM

好爸爸元旦日上陣！

近日上討論區行吓，竟然發現「好爸爸」於澳洲試閘第一。不錯，係前香港一哩王，現年 11 歲嗰隻「好爸爸」，而且，仲報咗名元旦日會上陣㖭。初初見到呢單嘢，我當堂嚇一跳，然後得啖笑，因為其實都無咩好震驚，反正之前都運咗去澳門只係冇跑，咁澳洲，相對就正路得多了。當然，網民反應就冇咁理性，有啲鬧爆馬主祖宗十八代，又有啲瘋狂咀咒個馬主嘅現役馬，咒佢一世冇馬贏。也難怪嘅，「好爸爸」於馬迷心目中有不可代替之地位，當年話要去澳門發展，亦嘈到拆天。不過人走茶涼，尤其走咗咁耐，都變冰茶了，故今次澳洲出賽，香港傳媒都較為冷待，網上也不算群情洶湧。

若你問我，當然不忍見到老態龍鍾嘅「好爸爸」被人蹂躪，也當然想佢可以安安落落頤養天年，但此馬話就話屬於全香港人嘅，決定權始終在馬主。或者馬主識聽馬話，知道「好爸爸」仍然想跑呢？子非魚，安知魚之樂？阿葉伯跑馬拉松跑到七十幾歲仲跑緊，你識乜。

已有當地賽事排位資料了， 2013 年 1 月 1 日澳洲費明頓馬場 New Year's Raceday ，第六場 Standish Handicap(G3) ， 16 匹馬角逐 1200 米，「好爸爸」負 133 磅全場最重， 15 檔起步，大家可以為佢打打氣。詳情可登入 http://flemington.com.au 睇睇。

用戶名	時間	積分	理由
EternitY	4/2/2013 08:31 PM	聲望 +5