港姐出身的林莉（Carrie）近年轉戰模界，愈見成績，最近更強攻台灣市場，獲當地珠寶品牌富商韓總垂青，更夜會兼發生疑似車震事件！好彩林莉馬上得到助手同化妝師做人證，好快洗甩嫌疑。不過，有米經理人兼緋聞男友Bolie一啲都唔鬆懈，日前Carrie趁聖誕前夕，去咗心儀嘅品牌Coach掃貨，雖然只係去買禮物，但緋聞男友全程都遠遠釘到實，連買嘢都𥄫到咁緊，有鬼異性埋到身咩？Bolie大爺真係辛苦晒啦！
趁住聖誕節前夕，林莉忙中偷閒落咗去中環Coach掃貨，辛苦咗一年，買自己鍾意嘅靚衫同手袋去獎勵自己之餘，仲選購小禮物饋贈身邊的工作人員。本報記者見到，林莉在店舖內騰來騰去，名模姿態上身，將首飾、手袋同靚衫拼上身，大擺Chok樣。不消一個鐘頭，她就揀中咗一條價值1,750元嘅蝴蝶結手鈪同1,650元金色手鏈，至於鎮店羊毛大衣就最貴重，要成26,700元。儘管大破慳囊，但Carrie仍面不改容，女人始終係愛靚，尤其是女為悅己者容。
揀男性銀包細心
揀完一輪自己嘢，記者發現她揀埋男性銀包，仲好細心咁睇間隔，話男人較喜歡短身，多插信用卡那款，未知是否送予Bolie！不過，Bolie全程從後睇到實，簡直係對Carrie目不轉睛。
Carrie說：「聖誕節可能要去台灣行騷，（會唔會見吓韓總呀？）哎呀，我哋冇聯絡㗎，上次真係有助手同化妝師在車上㗎。（Bolie有冇送禮物畀你呀？）你問佢啦！總結今年工作質同量都有調整，尤其是獲品牌垂青，而家我都差唔多有能力畀到首期置業，哈哈，但相士話2014年會有人送樓畀我，聽吓都開心呀。」
