百萬獎金人人都想要，李克勤主持的無綫新遊戲節目《決戰一分鐘》前晚播出第二集，為谷收視，遂找來19歲校花梁嘉琬（Whitney）出戰，她玩跑步遊戲時巨咪震撼螢幕，之後還出動脷功舔曲奇，索女兩招即冧爆宅男，在討論區火速被起底，Whitney被爆是模特兒曾拍快餐店廣告，有出鏡經驗，難怪被質疑是做媒參賽。
無綫近日掟百萬巨額獎金吸引觀眾擔凳仔睇電視，李克勤主持、逢周日播出的新遊戲節目《決戰一分鐘》才推出兩周，收視不俗，第一集平均收視30點，約有192萬觀眾捧場，雖然有觀眾批評遊戲無聊，但前晚第二集也保持29點平均收視，不但吸引約186萬觀眾收看，該集女參賽者Whitney除了成功闖六關奪得五萬獎金外，她全程表現淡定，加上樣子甜美和身材好，即時迷倒不少宅男，但同時有人質疑無綫為谷收視而找她做媒，內定參賽
樣靚身材正
Whitney是恒生管理學院商務翻譯系的一年級生，她透露是為達成搞英文舞台劇的心願而參賽，前晚她先挑戰頭關「手震腳震」，將計步器綁在手臂和大髀，要在預定60秒內郁動手腳累積500次，遊戲開始，Whitney發功狂跑，她的打扮雖然密實，但跑步動作令巨咪在鏡頭前跌盪不停，攝影師除拍攝遠鏡，還拍下她的近鏡和側鏡。最後順利達標的Whitney上氣不接下氣地接受克勤訪問時，仍不停深呼吸。
其後Whitney進入第二關「運轉曲奇」，她要將曲奇放額頭，然後扭曲臉部肌肉，務求將曲奇送入口，克勤不停提場叫她伸脷接曲奇，Whitney使出脷功，成功過關。第四關「筷膏長大」，Whitney要用筷子夾唇膏把它叠高，鏡頭竟離奇特寫了她的巨咪，其實她大笑時，胸口反應都力透螢幕。由於她樣靚身材好，故甚受宅男歡迎，網友不僅將Whitney玩遊戲時的誘人截圖貼上討論區，還將她人肉起底，踢爆她是模特兒，曾選校花，有恒管薛凱琪之稱，有豐富出鏡經驗，但也有人因此質疑她是做媒，乃內定參賽者。
遭質疑做媒
根據無綫公佈賽例，參賽者必須是六歲以上有香港身份證或出世紙的人，也沒合約束縛，參加者報名時要附上成功完成指定遊戲片段，然後由大會甄選。對於被質疑做媒，Whitney昨在電話中先呆一呆，然後說：「做媒？我又冇特別背景，本身係model，除咗呢樣冇特別，我係正常去面試，我都有好多朋友參加。」她指約一個月前接受面試：「由導演接見，佢哋問我如果有一百萬會點用，佢哋想揀啲追求夢想嘅年輕人參賽。」她估計是自己的理想打動了導演。
《決戰一分鐘》監製陳旭亮昨也在電話否認做媒，他說：「唔係，我哋節目有好多招募途徑可以參加，佢係循正常途徑，起碼你要玩到個game同埋有個OK嘅夢想我哋先會見，成件事絕對公平，啲遊戲貨真價實，玩到就玩到，冇得呃㗎。我印象中仲有一兩個校花校草，我哋唔可能因為佢參加過乜嘢比賽就唔畀佢參加。」
