出道僅6年，22歲的鄧紫棋（G.E.M.）憑稱冠湖南衛視的《我是歌手2》而成功打通中、港搵銀大道，廣告、巡演、商演、電影爭相邀請，錢途無限。據知，除以150萬跟合作4年的Maybelline續任代言人外，廣告商更打算加錢邀她兼任中國區代言人，中港代言價更去到300萬簽約兩年。身價勁升6倍的G.E.M.仲有附帶條件，講明因逗留內地較以往多，故一年五次的宣傳活動將大幅減至一至兩次，酬勞多了但工作量反而減少，G.E.M.果然今時唔同往日。
爆紅G.E.M.一「唱」沖天，只需兩周時間，其微博粉絲數量由幾十萬激增近四百萬，隨意上載一張素顏相，粉絲都瘋狂留言，更曾連霸內地網站百度風雲榜女歌手及美女榜冠軍位置，G.E.M.突然被推上一線，大量廣告商及商演送錢邀請，商演叫價亦勁升一倍，由20萬升到40萬人仔，身價格同陳慧琳等天后睇齊。另外片約亦有十多份，世界巡唱共21站，輕易吸金過千萬。跟參加深圳衛視《中國音超》獲激讚的謝安琪，不論迴響及得益明顯高數億倍。
對於廣告商排隊送錢大行動，G.E.M.坦承公司接到好多邀她合作的電話，但現在萬事以參賽行先，暫停接新工作。問她加人工會否獎勵自己？她哈哈大笑：「我交畀屋企人處理啦。」至於未來會否集中內地發展？G.E.M.無否認但強調要睇工作性質而定。雖然極忙，但G.E.M.仍保持運動量同健康飲食去保養肌膚質素，她識做地說：「因為我係彩妝廣告代言人，新拍嘅仲係純礦物BB CREAM廣告，唔可以走樣㗎。」
唔敢挑戰祖兒
對有傳續任彩妝品牌代言價勁升六倍，G.E.M.答非所問，「一出道就開始合作，我哋互相信賴，希望可以合作落去。」至於Maybelline公關對加價事沒有否認，「同G.E.M.合作咗幾年，關係好好。其實新合約仲處於討論階段，雖然價錢係高咗，但大家都好滿意新合約嘅價錢。」雖然全民皆捧到G.E.M.上天，但跟她有牙齒印的商台卻繼續對她零興趣，商台公關坦言，「商業電台無跟任何歌手交惡，所以毋須刻意修好！至於將來同G.E.M.有冇合作計劃？只可以說現階段未有。」
對突然爆紅一事，G.E.M.坦言需消化才能接受：「一做完節目見到微博多咗咁多粉絲真係嚇親，因為人數實在太誇張，接下來就要專心練歌應付每周北上嘅錄影。講真，我冇諗過升呢做天后，都係做番自己啦，會唔會立志挑戰九年霸的容祖兒拎最受歡迎女歌星？冇！我唔識答呀，最受歡迎呢嘢啲應該由觀眾決定。」
