陳冠希（Edison）自與台灣女友洪文安（Ann）拍拖後，二人經常甜蜜外遊，更不時咀嘴晒恩愛。早前Ann來港陪男友，Edison即帶她到中環掃名牌。原本買得好Happy，之不過Edison卻頻頻去廁所，一個鐘內去足三次，鬼咁掃興，可憐女友要呆站等候。事後記者致電家庭醫生關嘉美，她稱：「如果屙尿屙得咁頻密，可能有病，佢真係要去做檢查。」
自從Edison與Ann公開拍拖後，他不但轉死性，見記者識笑，還多了工開。早前客串吳君如主演的電影《金雞sss》外，本月七日由他孭飛的騰訊微電影《探靈檔案》亦會播出第一集。據知，此片是他重返電影圈「試水溫」之作，食粥食飯都是靠呢舖。他透露相隔多年再拍戲，自詡演技有進步，也期待外間有何評價，之後更會與曾志偉合作，相信都會幾忙。不過工作還工作，女友依然放在第一位。
去年聖誕，Edison過台灣陪女友，輪到農曆新年，Ann又來港陪男友，二人更現身中環置地廣場濕平。他們先到CELINE睇衫，最初由女裝入手。他們更邊睇邊玩，鬼咁煙韌，完全視店員無到。看了約十分鐘，Edison與女友突然急急腳步出，以為他們趕下場，原來是去廁所。解決完後，他們又重返CELINE搏殺，Ann更陪男友睇男裝。看了約15分鐘，Edison又要去廁所，更孖實Ann一齊去，不過女友只在門外等候。
Edison去完後，又拖實女友再返回CELINE睇手袋和飾物，只見店員好好服侍，攞完一樣又一樣，結果Edison揀了些女裝衫和手袋送給女友。不過等候期間，Edison忽然好急咁離開，原來他又是去廁所，今次女友好醒目，決定留在店內邊睇邊等。待Edison回去後，他豪氣地碌卡找數，然後再到LV，其間他又「閃」，不過今次不是去廁所，而是到樓下抽煙。如果身體唔好，好心就食少支喇。
