杜汶澤與黃秋生為CY女言論隔空罵戰，觀眾剝花生睇好戲，兩個大男人互片十日都應該夠皮了，不如轉台睇阿澤孭飛新作點低俗好笑吧，由錢國偉執導的爆笑喜劇《黑色喜劇》玩盡情色幽默，每次出場例必有大班囡囡陪玩的阿澤就連沖涼都巴閉過人，搵36G夏尉喻（Barbie）替他擦身，土皇帝作風抵死又好笑。
憑《低俗喜劇》翻身的杜汶澤近期好惹火，在facebook貼《豪情3D》海報即被檢舉為色情相，轉頭又因CY女梁齊昕與黃秋生掀罵戰，搞到冇朋友做咁話。
鬧巿出浴
低俗出位的杜汶澤在新片《黑色喜劇》中享盡齊人福，飾演魔鬼之子、黐了兩粒牛角在額頭的阿澤每次出場都好爆，繼閂埋門享受鋼管艷舞後，再整場美女鬧巿陪浴，點名叫36G Barbie比堅尼上陣，睇頭十足。
劇情講述飾演魔鬼之子的杜汶澤跟王祖藍私定交易，只要祖藍一叫便會現身幫他，誰知一叫即到的阿澤正在享受泡泡浴，仲要有個G奶Barbie幫他擦身，「阿澤自己揀女的，話最緊要有睇頭，不過拍攝當晚天氣好凍，大約得攝氏13度，人人披住件羽絨，佢就要剝光浸浴。」劇組人員說。
童菲狂抦祖藍
鬧巿出浴的阿澤半張嘴反白眼，表現好High，咁又係，試問Barbie着住比堅尼倒奶咁幫你擦身，你能抗拒嗎？反觀祖藍就慘，經常被野蠻女友童菲拳打腳踢，還要當街咬耳虐待，場面爆笑，「童菲會分飾三個不同性格的女友，拍攝時鬼咁投入，打到祖藍叫救命。」知情者說。
錢國偉導演亦玩埋一份，飾演楊思琦情夫，兩人更會有親熱戲。
