18歲入行、24歲走紅的金馬影后吳家麗，於50之齡決定首當導演，本月16號上映嘅處女執導作《花街柳巷》就玩重口味，講述有關鳳姐遇到變態殺手嘅驚天復仇故事，集血腥同暴力，令人不寒而慄。不過，吳家麗就拍得非常enjoy，仲嫌去得未夠盡，可以再玩激啲，佢話：「其實每個人內心都有個計時炸彈，惡魔永遠在身邊！」
自導自演的吳家麗搵來曾參與近30部電影製作的翁秀蘭一齊玩，故事設定成令人心寒的殺妓懸疑案，以血腥恐怖探討人性，結果兩個女人一拍即合。她說：「喺電影世界男導演太多，打造咗好多男人戲，好似警匪片等，而愛情片又多人拍過，所以我同翁秀蘭就揀咗個特別啲嘅題材帶畀觀眾驚喜，以驚慄、血腥懸案去解構人性血淚史，解說人性嘅黑暗面，從故事人物同身世帶出對世界嘅控訴，原來犯罪背後係有經歷。」
太投入 險崩潰
雖然睇過試片嘅觀眾話好血腥，好嚇人，但吳家麗就話作為導演永遠唔會滿足：「有場戲講我去到密室見到班女仔死晒，我摸完佢哋流出嚟嘅鮮血，激動到衝出走廊驚叫，睇下有冇生還妓女回應我？呢場戲我代入到聲嘶力竭，幾乎崩潰！cut機後要時間平伏情緒，睇返play back，齋聽把哀鳴聲經已好寒。其實現實生活中我好怕血，電影夢世界又係兩回事，玩得好過癮。」她還打算下部戲以精神病為題材加以發揮。
今次挑選了新晉演員洪金寶第三個仔洪天照及郭富城前緋聞女Kabby(許雅婷)擔任主角，吳家麗就飾演鳳姐包租婆：「香港電影演員出現斷層，好應該提攜新人。」問到會否考慮畀機會張栢芝？她有所保留說：「我未知下部開乜戲，不過會採取open態度，睇下時機啦，其實我唔識佢，但好欣賞佢演技，其他事情唔太了解，卻唔好扼殺佢演技。」
