陳敏之去年嫁作雷太後，蜜月都來不及去就要復工拍劇，同張兆輝在《性在有情》飾演一對。話說呢部劇監製文偉鴻係繼《使徒行者》後又一創新大膽之作，敏之剛做人妻就在劇中大講性愛嘢，主動在街頭擁吻張兆輝等連場親熱戲。早前煞科在即，兩位男女主角連同劇中演員十數人，再加埋大批臨時演員，晒冷在火炭封咗條街拍一場敏之好心做壞事，搞到輝哥遇交通意外受傷，之後大Sell感動嘅大場面戲。
今次呢場晒冷戲同性無關，但同情有關，話說飾演社工嘅輝哥原來好怕血，做性治療師嘅敏之就諗咗個鬼主意，同成班人搞場大龍鳳嘅撞車戲，現場有兩部車，一部反咗一部撞凹咗，同埋成班傷者，都係敏之搵嚟嘅道具同臨記，以為咁樣就可以令輝哥克服怕血嘅障礙，就喺敏之引輝哥去撞車現場期間，輝哥真係畀架煞唔切掣嘅貨車撞到，搞到掛晒彩。敏之見自己搞出大頭佛又見愛郎受傷，梗係內疚到死，但輝哥竟然冇怪佢，仲覺得敏之為佢做咁多嘢好感動，兩個人喺馬路中心相擁，然後，成班親友鍾景輝（King Sir）、許紹雄（Benz雄）、盧宛茵（Madam Lo）、江美儀、阮兆祥、沈震軒、陳嘉佳（小寶）就走出嚟趁墟，好彩無跳起Yeah。
拍出真感情
成班演員合作呢部劇都有三四個月，拍出真感情在所難免，呢頭見King Sir、Benz雄、Madam Lo幾個老戲骨加埋小寶等埋位不忘談笑，呢邊就江美儀帶埋愛犬嚟開工仲玩自拍，最後變咗成班演員大合照，跟住趁完墟，又見王君馨搭住沈震軒玩Selfie，無他嘅，部劇煞科，大家合作咁開心自然會唔捨得，想話影低啲相留住個回憶咁啫。
