由王晶監製，以倪匡衛斯理系列為藍本嘅網劇《冒險王衛斯理》第2季《藍血人》中，40歲的伍允龍(Philip)擔重戲飾演羅約翰，除打到飛起，仲有唔少情慾戲，奉旨跟35E「中國美胸」之稱的內地女星徐冬冬咀不停，兩人每次相遇都會錫錫，全劇至少親吻50次。對於呢個「筍job」，伍允龍竟然話冇feel：「我都咀到冇感覺。我發覺拍感情戲同拍打戲幾相似，都係畀觀眾覺得我哋搏擊緊，同樣係借位啫。」

　　習武的伍允龍主力拍動作戲，鮮有拍情慾戲，在《藍血人》中伍允龍半裸上陣與徐冬冬不停纏綿，其中一幕冬冬着上「Big」爆火辣3點式色誘Philip，兩人在泳池深情擁吻，看似好激情，但伍允龍就不太好受：「因為自己游水唔叻，女演員係怕水，所以一啲都唔浪漫。而且自己拍感情戲經驗唔多，好彩冬冬好專業主動會帶我入戲，好nice。因為熱愛拍戲，所以點都係個挑戰，我對情慾戲唔會抗拒，亦唔會特別追求，主要睇故事應該冇問題，但自己走武打路線，會偏向呢方面發展多啲。」

　　劇中將原振俠改成羅約翰，兩人都係腦科醫生，功夫好好同屬冒險王。以往他有睇黎明演《原振俠》，問到兩人邊個較吸引？他大笑說：「好難答，好尷尬喎，我諗兩個都吸引，因為角色性格寫得好好，既有好功夫，又照顧兄弟，我唯一希望肌肉吸引到觀眾，冇浪費喺健身室嘅努力。呢套劇好多打戲，最難忘第1季《支離人》喺電梯困獸鬥同外國武師對打一幕，辛苦地拍足3日，打到周身骨痛，可惜剪咗一半。最搞笑第3季去中山拍外景，我喺寺廟木柱位一個打10多個，打到尾又攰又落雨，擺好甫士轉身追其他壞人時一唔小心撞到木柱暈低咗幾秒，因為平日愛搞氣氛，工作人員以為我玩嘢，帶笑叫我起身咪玩啦！」