40歲嘅李家鼎細仔李泳豪，最近終於走出舊愛陰霾，同台灣女子Agnes發展新戀情。豪仔直認有拖拍，又話父母鼎爺同施明對女友印象好好，已經視佢為結婚對象。
豪仔十年前同楊思琦突然爆出分手成為C1頭條，咁多年來感情方面冇咩著落，而思琦而家就成為2個小孩的媽媽。
本來形象唔錯嘅楊思琦，2002年因為拍《血薦軒轅》而同李泳豪撻著。拍拖9年，個個都以為佢地會拉埋天窗，點知2011年楊思琦單方面表示同豪仔分手，又有傳當時思琦已經有喜，新歡係前港隊跳水運動員吳帥。
「幾時分手」呢個講法一直係呢件事最大疑點，思琦話幾個月前已經決定，但係豪仔就話思琦同傳媒宣布完先send短訊同佢講。對思琦念念不忘嘅豪仔甚至話只要思琦肯回心轉意，唔介意養埋個BB！而鼎爺一家對於思琦嘅說法好不滿，鼎爺否認一早知道呢件事，仲爆粗大鬧，又話思琦嫌佢地一家窮。
不過後來有報導指吳帥原來係空心老倌，思琦即使陀住B都決定狠撇。2012年思琦喺美國誕下女兒楊卓穎，坐完月就向TVB報到復工搵奶粉錢。2014年離開TVB轉為北上發展，靠登台同商演搵食，一手湊大女兒。2019年10月思琦宣布同圈外男友結婚，上年2月誕下B仔，但係BB爸爸身分從未曝光。
