周秀娜（ Chrissie）入行冇耐已經有機會去外國影展同人爭獎，都咪話唔犀利，佢有份拍嗰部由彭發執導嘅電影《關人 7事》入圍「第三屆首爾忠武路國際電影節」，大隊今日出發去韓國。 Chrissie噚日晏晝去完沙田出席「 Be My Own Bag兒童環保袋設計比賽頒獎禮」，就急急腳去咗銅鑼灣為影展揀選戰衣，仲好快手咁成功揀咗 3件晚裝。
Chrissie去咗間叫 Pink嘅舖頭揀咗 3件品牌 Martini嘅晚裝，都係深色裙為主，有啲意外係啲衫都唔算性感喎！呢排佢咁多工作，搞到個人都瘦晒，由原本 100磅跌到得 92磅，條腰仲誇張得 22吋，所以揀嘅都係加細碼（ XS），不過佢睇中其中一件細碼裙就要後面束腰至啱着。
Chrissie話韓國啱啱舉行完南韓前總統金大中國葬，影展行紅地毯嗰 part大會都要低調，所以自己揀衫都唔會太鮮色。 Chrissie第一次去爭獎，心情緊張，佢話唔會有太大期望，因為自己始終係新人，只係當去觀摩吸收經驗。
另外， Chrissie之前出席個環保活動時話自己有樣最環保，就係唔會浪費食物，通常同朋友食飯，大家食唔晒嘅都係由佢包底，但食極都係咁瘦，好彩做咗豐胸療程所以個胸冇縮細到。
