信主後，孫耀威 選擇坦承相對，公開認定秘密拍拖一年的陳美詩 （Macy）為結婚對象，還隔空傳情唔怕你笑。昨日凌晨，老孫拖Macy到中環夜蒲狂歡，離去時，十指扣女方慢步遊中環，誰知一見有記者，老孫即毫不留情Fing甩女方，又快步走開保持距離，以為佢想撇女速閃？又唔係喎，轉頭老孫又用「ERXX」自家專車接送女方返歸，搞到咁肉酸，唔知為乜。
孫耀威飛甩楊秀惠 後，速搭樣甜身材正的陳美詩（Macy），秘密拍拖同居一年才公開承認戀情，算係畀個名份女方咁話。
專車接送女友
昨日凌晨二時，孫耀威拖着女友到中環「Play」夜蒲，滿場飛的他興奮介紹朋友給Macy認識，又飲香檳又跳舞，酒過三巡，略帶醉意的他十指扣着Macy離開，友人見他行唔穩，主動護送。
老孫一直拖實Macy橫行後巷，又在蘭桂坊街頭慢行，有說有笑，但當他發現有記者在場，即Fing甩Macy的手，急步行，被撇甩的Macy一臉無奈，之後，刻意保持距離的兩人在幽暗街角密斟數分鐘，老孫突然拔腿就跑，衝上一條長樓梯。
同一時間，Macy急步登上老孫名下「ERXX」保母車，以為大計得逞，誰知中環街頭塞車，被困在車上的Macy避無可避，獨自面對記者鏡頭，尷尬得以手遮面，場面𤓓到暈。
