成功俘虜不少宅男的糖妹（黃山怡）雖被傳已嫁作人妻，但仍得到宅男力挺，唔係齋講，係堅撐，據悉糖妹代言的男士護膚品銷售數字倍增，廣告商當糖妹係寶，未約滿已經跟她洽談續約事宜，仲主動識做地調整酬勞，睇嚟已婚傳聞對糖妹唔構成任何影響，反而提高人氣，呢件事咪話唔勁！
甜到漏的糖妹（黃山怡）日前為代言的GARNIER護膚品牌拍攝秋冬季補濕產品廣告，知道代言產品銷量倍增，並獲廣告商欽點以開心價續約，糖妹梗係笑到見牙唔見眼：「班fans真係好支持我，有時我見到佢哋讀書壓力太大，面上生滿瘡瘡，我都有主動送上清痘印走珠筆畀佢哋用！」果然識做，唔怪得粉絲對她死心塌地啦。
拍攝當天，糖妹依然Sell得意妹形象，揀選背心短裙上陣，擺出可愛表情：「我同G.E.M.路線唔同，我係打底王，要走健康路線，性感只係留番畀將來老公，唔理佢鍾唔鍾意，我都會逼佢睇，哈哈！」
對於被指入行前已下嫁一名網頁設計師結婚，糖妹啼笑皆非，視作娛樂一則：「真係好流呀，周刊連我老公張相都冇，我畀公司同事取笑，話我嫁畀一個紙板人，激死！坦白講，我恨嫁，但先要財政獨立，買到樓，照顧到自己先算啦，目前距離目標好遠呀，期待五至六年後可以成事，咁現時咪嫁住畀個紙板人先！」
