趙碩之師弟妹鍾一憲和麥貝夷，雖然以情侶檔出道，但兩人一直表示不會過電，不可能跟對方拍拖。不過正所謂日久生情，日前本報發現兩人孖住到觀塘買聖誕禮物，兩人雖然未有親暱舉動，但全程不停打情罵俏大耍花槍，似情侶多過似拍檔，看來這個情侶檔可能已撻着，隨時變真情侶都未定。
鍾一憲和麥貝夷以情侶檔出道以來，一直發展不俗，近期他們合唱的《勾手指尾》在網上的點擊率更達200萬之多，令兩人成為新一代學生情人。雖然兩人經常「拍住拖」出現，但他們表示跟對方不會過電，所以未有緋聞傳出。
做一世知己
日前本報記者在觀塘APM發現鍾一憲和麥貝夷孖住行街，他們到了LOG-ON選購聖誕禮物，雖然他們未有拖手等親暱舉動，但全程有講有笑相當開心。之後互拿物品來整蠱對方，不時打情罵俏十足十真正情侶一樣，最後他們買了孖煙囱和公仔等禮物離開。
事後記者聯絡鍾一憲和麥貝夷，他們否認兩人已由拍檔變為情侶，「我哋係好好嘅拍檔，好有默契，就係因為咁合拍，若然拍拖將來分手，唔可以再合作咪好可惜，都係做一世知己朋友好啲。」至於當日確是專登買禮物互送，「我哋都想多謝對方呢一年嘅幫忙，仲有老闆同經理人，同事佢哋都有份，因為聖誕前夕我哋好多學校騷要做，所以趁早去買定。」
