衰太Cheap，34D人工美眉許穎（Phoebe）早已被foul出局，過去半年工作零碎，間中黐到活動，見人就吹噓自己即將出碟做歌手，即係咁，張栢芝的鵝公喉都叫做有巿場，Phoebe應該得啩，又因為吹得，Phoebe獲邀為日本動畫電影《神秘之法》配音，成功揮低32E袁嘉敏做女主角，日前更比堅尼上陣玩人體彩繪，「Phoebe主動劈價接Job，又講明點玩都得，講真，佢個角色好奀之嘛，但計落條數都抵玩咪用住先囉。」知情者透露，Phoebe這次是兩萬蚊全包宴，隨傳隨到無詐型，算係咁。
唔知為乜去咁盡，寫真血戰一仗，Phoebe輸到無影，打後幾個月工作寥寥無幾，慘過成名前，「無計，形象太Cheap，好多客都話明唔要，有時搞活動想搵性感妹妹仔撐場，都唔敢搵Phoebe。」一名資深公關透露。
心口開窿見人
低俗過火仍未知衰，Phoebe每次出活動例必搵水吹，不斷對外聲稱將會出唱片轉型做歌手，大家即管聽住先，一心想靠把聲搵食的她最近賤價接Job，為日本動畫配音，「Phoebe主動打嚟𢱑，講真，公司一早搵咗袁嘉敏做女主角，嗰個Leika只係閒角，但在商言商，多個戥腳又無乜所謂，佢又咁肯博，講明點玩都得，原本角色着旗袍好密實，佢就要求我哋造一套心口開窿的，話玩人體彩繪又一口答應，仲叫我哋嗌記者到場，老闆都幾滿意，所以最後都加到兩萬畀佢。」
玩彩繪當日，Phoebe僅以比堅尼打底，任由男彩繪師在身上畫畫，記者到場探班，Phoebe即嬌嗲大叫：「哎呀，好痕呀。」
