最近班0靚模，好似接二連三「出事」，近嘅就有媽模Mia同前夫莊家傑互數，結果前夫大反擊、狂數Mia整容隆胸偷食同唔照顧仔女，越搞越大煲。

另一個出事嘅，係「安琪蓮娜」張暖雅。佢同前經理人解約後，一輯自稱作藝術收藏嘅裸照神秘流出，張暖雅聲稱輯相連埋電腦hard disk一直都係擺喺前經理人度，懷疑有人放相，仲話要報警，點知經理人早佢一步報咗警。事件仲披露埋張暖雅原來已經同《一路向西》肥嘟嘟導演胡耀輝秘婚。「女神」幻滅了。

失蹤一排，張暖雅再戰江湖。先係晒幸福。有日胡耀輝貼咗一張老婆大人——即係張暖雅喺廚房煮飯嘅相，大嗌好肚餓，張暖雅就回應:「你值得。」性感女神變廚娘仲掛住條圍裙，真係sweet。相比Mia要同前夫互數，張暖雅同肥嘟嘟導演呢pair，幸福得多。

不過，人總係要搵食0架。家陣張暖雅已由「0靚模」、「女神」變成「人妻」，想行番之前條路唔易，但都要硬著頭皮行落去。所以，依家張暖雅繼續頂住《喜愛夜蒲2》同《一路向西》女主角身份，去祖家……即係國內嘅夜場搵食，今個月底佢好旺場呀，幾乎晚晚有騷，超性感打扮，短到無可再短嘅裙，谷胸上陣，喺麻甩佬群中唱歌仔同打碟。

不過見到海報上一句「2012炙手可熱的香港影壇明日之星」就覺相當弔詭。2012已經過咗，但又話佢係「明日之星」，即係「過咗去嘅明日之星」，咁仲算唔算係明日之星？