王晶監製的新片《天師鬥殭屍》中明醒男主角關楚耀（Kelvin）！因為戲內有34F新女羅子喬（Bella） 做主動爬上Kelvin身又咬又錫，意識大膽，最爆係兩個都得件面衫，冇着內衣打底！喺身貼身狀況下，唔怪得Kelvin自爆有生理反應，好enjoy！聽到Kelvin咁講，Bella好興奮：「如果佢冇反應就代表我做得唔好啦！」
由關楚耀、羅子喬、鄭中基（Ronald）、伍允龍等演出的電影《天師鬥殭屍》，關楚耀跟新人羅子喬的一幕親熱戲成亮點，Kelvin被34F導彈尤物胸壓，又咬又錫，Kelvin抵死笑說：「咁入戲梗係有感覺㗎啦，只可惜enjoy得一陣，因為按照劇情，我要推開佢！」
Bella亦大讚對手說：「如果佢冇反應就代表我做得唔好啦！佢好靚仔，好肯教人，係一個好男人，應該會有好多女仔鍾意佢！」評價咁高，會否揀Kelvin做男朋友？Bella掩面傻笑，最後才說：「我只係專注工作，冇諗過呢方面！」Kelvin大讚新片好玩：「我做個大奸角，睇返playback都覺得自己好樣衰呀！今次喺喜劇前輩彪哥（元彪）同埋Ronald身上學到唔少嘢，真係可以帶動我發揮喜劇細胞，唯一係要化殭屍妝，搞到塊面敏感生晒粒粒，長指甲又不便去廁所。」
