黃心穎最近在TVB劇《東坡家事》飾演刁蠻任性的「蘇小妹」，跟平日被網民封為「心穎BB」的形象剛剛相反。其實心穎自12年當選港姐亞軍後，本來形象健康，及後屢傳緋聞，對象更以人夫為主，令她慘被指為「姣精」，面對這些緋聞攻擊，心穎曾為此喊爆，不過亦令她學識了避忌。
早前歐陽震華（Bobby）接受本報專訪時，指心穎跟親妹年輕時很似樣，心穎亦覺Bobby好有親切感，「我嗲哋同Bobby好似樣㗎！見到Bobby就好有家人feel，做兩兄妹好易投入，有場我同佢嘅感情戲本嚟唔使喊，都忍唔住喊咗。」
按部就班
講到喊，原來「心穎BB」入行後也有過好大壓力而爆喊時，就是跟吳啟華傳出緋聞後，對方剛巧爆出離婚消息，令她慘變拆散家庭的「小三」，「嗰時真係好大壓力，搞到人哋離婚喎！試過勁喊呀！好在屋企人明白咩事，都有安慰我，啟華哥又即刻澄清咗咋！今次套劇都有傳浩信，真係唔想搞到人哋屋企，自己都會避忌啲㗎啦！」
談到早前陳凱琳被圍插演技差，同樣演戲經驗不多的心穎，亦很明白對方感受，不過直言寧願按部就班，不會羨慕對方極速當上女主角，「其實新人真係需要時間慢慢學習，希望大家畀多啲時間我哋啦！不過，我個人比較慢熱，好似依家咁，一套比一套多戲份適合我多啲，反而太快做主角我未必應付到。」
