文詠珊Janice Man離開A Music後，自組公司，簽約太陽娛樂尋求發展機會，去年勇闖神州連拍《畢業歌》和《蜀山戰紀之劍俠傳奇》兩劇，加上《赤道》的破格演出，讓她成功由「模art」轉型實力派演員，說到2015年贏得一張漂亮成績表，JM坦言捱得好辛苦，她說：「這一年經歷好多，係我自己選擇往外闖，人在外自然會成長得更快，我這種人鬥心強亦好勝，愈難就愈想去克服，唔敢奢望得到什麼獎項，得到觀眾認同已經好滿足。」訪問見街這天，JM已身處內地為新劇開工，聖誕除夕新年皆在工作中度過，「能遇到好劇本就要珍惜，人大了更會清楚自己想要什麼，點辛苦都要頂硬上，或許我真的是辛苦命，愈忙愈開心。」
做人目標清晰好重要，Janice Man 過去一年選擇性工作，三分二時間留守內地拍劇，三分一時間拍攝《兇手還未睡》和《寒戰2》兩部電影，工作無停，「這一年過得很充實，可能我本身鬥心強，開公司可為自己挑選好劇本，我都知出活動拍廣告搵錢容易，但我不想再做花瓶，知道要成功就要有所犧牲，係我自己選擇往外闖的，再辛苦都會頂硬上，到有一日頂唔順先算。」JM坦言對自己要求高得有點苛刻，拍內地劇堅持以國語對白上陣，無非想效果更自然，「我國語唔算好叻，所以一直有找老師學習，返內地工作唔會帶香港助手跟身，寧願在當地請助手，一來可以練國語，二來可熟悉當地文化。」
甘願捱世界
人在異鄉特別掛住屋企，JM自言離港的日子愈久home sick 愈強，在荒山野嶺體驗過無廁所的窘境後，這次再到寧波為神魔劇《九州海上牧云記》開工，JM選擇自掏腰包租房車跟場，出發前更準備充足日用品，她說：「這次一去便到四月才回來，角色幾神秘，會穿越不同時空，其實我一向好獨立，自己識照顧自己，每次都好似camping咁，今次要做好保暖功夫，便帶齊暖包、保濕器、即叮飯、咖喱湯包，現在比以前tough好多，之前拍《蜀山》有400幾場戲，每日拍成十幾個鐘先收工，返到酒店直頭虛脫，還要花兩小時做功課背對白，真正休息時間只得三個鐘，我知在內地剛起步點都要捱，唯有頂硬上，起初壓力好大日日喊，驚自己太攰會做得唔好，不過喊完又一條好漢，以前可能會搵人傾訴，現在人大了，反而唔會，反正自己都會分析，真係唔開心就獨個兒發呆，聽音樂，放空自己，想通了就能跨過去，這段時間EQ和IQ都有所提升，人在無助的時候可迫自己長大，算係一種training，因我知道呢個世界無嘢係唔得，我幾好勝，唔一定要靠男人back up。」
《赤道》成強心針
回望2015年成績，JM笑言好滿意，《赤道》讓她成功轉型，「係打了支強心針，自己都好鍾意《赤道》個角色，真係唔敢奢望得到甚麼獎項，得到大家認同已算贏，完成《牧云記》後會再拍一部電影，現在仍在挑劇本，2016年會keep 住工作，亦想試搞生意，想做些自己未做過的事情，最近亦有睇樓，主要係買給家人的，就等樓價再穩定點便入巿，心目中想搵一千呎三房單位，希望家人住得舒服。」
跟男友諗結婚
提到男友吳啟楠Carl，感情事向來低調的Janice 甜笑說：「大家相處好開心，他教識我好多，不同世界的人走在一起幾有驚喜，大家都係重視家庭的人，但我又唔急結婚，因我哋兩個都係工作狂，enjoy呢刻最重要，要取得平衡，原來當兩個工作狂碰埋反而更懂得體諒對方，大家有picture過結婚，但又冇認真定時間，不想有壓力，就交畀個天，timing到自然會發生。」
