行事好有個性的麥浚龍（Juno），早前透露執導的1.5億元大製作《風林山火》，搵嚟大卡士金城武搭梁家輝，令人期待。最快下年初執導演筒的他，日前就爭取時間，一連兩晚「湊女」。頭一晚，Juno與中英混血女友戴庚玲（Janine）去圓方睇戲，二人同居多年，超有夫妻相，身形和衣着好一致，驟眼睇似足twins。另一日，「雙J」又情侶裝去中環搵食。身穿加大碼冷衫的Juno鬼咁搶眼，係人都認得佢啦！
家族資產億億聲的闊少麥浚龍，父親係中建置地(261)主席麥紹棠。現年32歲的Juno，入行十幾年緋聞女友只得三個，首位是他視為女神的鍾欣潼，再有疑拍電影而短暫邂逅的蒼井空。而得龍少親口承認的就僅得混血模特兒Janine。「雙J」戀約二〇一〇年開始，二人高調同居，甜蜜戀情9個月速玩完。直至13年中，「雙J」復合，感情升溫，惜Juno奉行不婚主義，二人唯有拖住先。
女友勁嬌嗲
日前晚上，「雙J」戴帽穿上米色情侶裝十指緊扣去圓方睇八點場的西片《禁室殺戮》。兩人白色背心加冷衫闊褲，鬼咁襯。加上的骰身材，猶如twins。只見Janine一直繞住男友手臂，連玩手機都唔肯放手，表現嬌嗲，好冧男友。四眼男助手送Juno入場後，即走人。到散場，男助手又準時恭迎闊少，然後傍實「雙J」，落停車場上車離開。
另一日，二人轉去中環鴨巴甸街附近搵食。今次潮人Juno改穿加大碼長袍冷衫，女友亦以長身白恤衫襯男友。「雙J」和四眼男助手和在西餐廳門口企街等位，間中少爺仔又「叉吓電」，仲貼心幫女友點火。等足十五分鐘都無位，三人上車轉場，兜番去擺花街的樓上西餐廳，揀戶外dinner，方便「叉電」。
