拍拖5年嘅林峯和吳千語，由傳「婚訊」變成「分訊」，月前同日先後宣告5年情告終。卸下「峯嫂」光環後，有指24歲嘅千語身價即時大跌，活動價由以往10萬降至4萬元。加上有傳其老闆黃百鳴改捧鄧麗欣，認真人財兩失！不過，盛傳早已秘撻前政協施子清長孫施伯雄嘅千語，似乎全無情傷。日前見佢孖星級形象指導好友馬天佑遊銅鑼灣時，心情勁靚。尤其喺冒險樂園喪玩，千語全程心花怒放，絕對唔似失戀囉！

        前「峯嫂」吳千語，早年簽約黃百鳴電影公司旗下，12年與林峯合拍電影《男人如衣服》時火速撻著，卜卜脆嘅千語BB更獲年長14年、一直唔肯公開戀情嘅林峯公開認愛，女方人氣、身價飈升，成活動寵兒。私底下亦獲愛郎寵幸，出入名店、有車接送，預演少奶生活。但自3月正式宣佈分手，千語身價大跌，生活打回原形。

  日前周六傍晚，愛晒長腿嘅千語，孭住個CHANEL黑白手袋，將個Goyard藍色長銀包就咁插落小手袋，孭得招積。頭髮散亂嘅佢無懼途人目光，捉實戴口罩嘅觀音兵馬天佑，貼地行百德新街LOG-ON。當時，二人身邊仲有對連體嬰、陳冠希好友兼潮人Kevin Poon(潘世亨)和長髮女友，呢pair拖友不時攬到實又咀嘴，勁sweet，閃到眼盲。四人喺店內主要陪馬天佑睇手機殼、黑色口罩等，四人嘻嘻哈哈，嬉戲多過睇嘢。最後，馬天佑買咗個黑色較型嘅新口罩，即場換咗個舊嘅即棄口罩。一行人再去附近嘅百老匯，陪馬天佑睇手機。

  齋行十分鐘無收穫，四人轉場去皇室堡嘅冒險樂園喪玩，Kevin火速拎出張千元大鈔換幣O氹女。四人分兩組鬥玩掟籃球、推枱球等，千語玩到忘晒形，件衫扯起露肚仔都懶得理。玩完兩個game，四人再去「掟彩虹」，千語手風唔錯，贏咗幾張劵，然後再去會合Kevin玩夾公仔，見兩男差啲夾到公仔，千語緊張尖叫，最後失落而回，傻笑一餐。玩足一個鐘，Kevin和女友走先，千語和密友去買雪糕食，最後上好友七人車離開。