17歲美少女廚神胡心諾 Rainbow昨日與另外 4位 o靚模推出寫真集，被本報踢爆與老闆 Admond挽手拍拖的她，死撐指照片只是角度問題，擺明講大話。而 Admond昨日臨時縮沙未有現身，不過繼被踢爆拍拖之餘，又被趙碩之指出糧唔啱數，夠哂頭痛。
是非 o靚模胡心諾昨日與 Lavina（鍾蕙芝）、 E Cup Baby劉欣宜（ Miyoko）、翻版 Twins周凱盈（ Monique）和勞詠君（ Tian）一同到旺角信和中心，出席《夏之盛放》寫真集首賣。現場約數十 fans排隊，加上傳媒近百人逼爆現場。
狂眨眼心情緊張
Rainbow對本報踢爆她與老闆 Admond的戀情明顯有備而來，但與記者對答時又不斷狂眨眼，似乎十分緊張。被問到拍拖多久時，
她說：「其實我當佢係哥哥，啲相都係角度問題啫。」被追問手挽手又攬腰掃 pat時，她繼續死撐說：「都係角度問題啫。」更肯定地說沒有拍拖，擺明講大話。之後她又否認於男方家中過夜，她說：「其實係最近工作好忙，收工之後上去拎返架 PS3，半個鐘就走咗。」之前趁紅即借勢封胸的趙碩之，面對來勢洶洶的 o靚模，昨日即以一身性感打扮出席另一活動，又踢爆 Admond出糧有問題，她說：「我係兩、三年前曾幫佢做過一次影相會，當時我已知 Admond同一個𠵱家唔活躍嘅 model拍拖，佢仲呃我哋鐘，明明係影 9粒鐘，但係就畀 6粒鐘錢，對於我哋努力搵錢嘅學生係唔公平囉，不過佢就冇媾過我。」
湊女變媾女的老闆 Admond臨時縮沙未有出席活動，他更與小女友夾口供，死撐未有錫女友額頭，更辯稱只是 Rainbow有異物入眼，
他接受電話訪問時說：「我哋唔係拍拖，不過成日都咁玩，見到嘅嘢係角度問題啫，我冇錫佢，可能因為佢有沙入眼，我幫佢吹走啫。」
雖然兩人死口不認拍拖，但事實上本報記者當時於現場清楚目擊兩人拍拖的甜蜜溫馨，更拍下獨家短片，讀者可隨時上蘋果網瀏覽重溫。而早前被指狼媾 Rainbow的方力申，昨日到亞洲博覽館出席記者會時回應時說：「我有睇報道，不過唔會回應喇，根本成件事由頭到尾都唔關我事。」
