滕麗名日前在Blog中自爆分手，記者向其緋聞男友郭政鴻及阿滕求證，但二人卻處處維護對方。據知鴻仔已盡力箍煲，希望令撒嬌的女友回心轉意。
滕麗名與魏駿傑當年的一段情，令阿滕白白浪費九年青春，雖然阿滕自兩年前起多次被拍得與鴻仔出雙入對，惟她一直沒有親口承認鴻仔是男友，但他們的戀情已是圈中公開的秘密。不過，地下情近月受到考驗，事緣情緒化的阿滕，眼見鴻仔工作日多，因聚少離多而有感備受冷落，於是在Blog中「扭計」，希望得到「男友」關心：「今天我的感情世界重回一片空白，我依然等待着他的出現……我只希望跟他的世界裏沒有背叛、出賣和欺騙，只有信任、分享和愛護……」
讚絕世好男人
阿滕昨日在電話中解釋：「我所指嘅『背叛、欺騙』係講我嘅愛情觀，鴻仔係一個絕世好男人！大家唔好拖人落水！（分手？）我從來冇認過同佢拍拖，點分手？總之我依家冇再唔開心，我喺Blog上講嘅『他』，我唔會透露身份，況且分手係私人嘢，我唔會講！（再見亦是朋友？）我哋不嬲係好朋友！就算將來再合作拍劇都唔會尷尬！」
問到是否激嬲阿滕，鴻仔雖然未有正面回答，但言談間流露兩人交情非淺：「我唔清楚佢嘅情況！不過，佢對愛情百分百投入，我會了解吓佢發生乜事！（扭計定分手？）我哋都冇認過拍拖，所以冇分手呢回事！（佢猛讚你好仔！）其實邊個男仔同佢喺埋一齊都會好幸福！」對於阿滕與鴻仔傳出分手，網友均大感可惜，更認為兩人相當合襯！
