書展本周三揭幕，周秀娜的疑似「露暈娜」寫真集，遭趙碩之狂寸刷牙照意識不良，反 o靚模盟主 Isaac也指周秀娜搞獻吻會滋擾書迷。周秀娜昨日大反擊，她指寫真書並非教科書，旨在娛樂讀者，更反斥去年趙碩之拋胸切魚生宣傳寫真集，揶揄師姐一番。
上圍 32D的周秀娜以疑似「露暈娜」作賣點的寫真集近日成圍攻對象，除了趙碩之和戴夢夢雙劍合璧狂踩意識不良外，反 o靚模盟主 Isaac（張振海）前日又指周秀娜在書展搞獻吻會，與書展主題格格不入，並會帶來混亂滋擾書迷。
去年推出谷胸寫真集而人氣爆燈的趙碩之，前日寸爆周秀娜的食雪糕和刷牙照，溶了的雪糕及牙膏狂滴落胸前，趙碩之力斥意識不良，周秀娜昨日在電話回應：「我出寫真集只係想娛樂大家，分享我成長嘅回憶，留低 24歲嘅我，寫真集好多係我個人嘅諗法，我希望大家睇完會鍾意。呢本唔係教科書，睇完唔教到人刷牙同食雪糕。」其實趙碩之去年宣傳寫真集《趙碩之夏》時，都曾低胸切魚生，周秀娜反擊：「性感切魚生，亦唔代表新鮮啲。」趙碩之前晚在灣仔會展演出時裝騷，繼續性感演繹學生設計的新裝。
周秀娜昨日更改口供指書展搞簽名會，而非獻吻會，她說：「我係講過，如果寫真集喺兩日賣晒，我要每人錫一啖報答 fans啫。」她又表示從朋友口中獲悉 Isaac收到 Lavina（鍾蕙芝）的寫真集後態度軟化，周秀娜說：「如果送本寫真集可以化解佢嘅怨恨，我可以送 3本畀佢，希望佢都可以睇得開心啲。」對於成為眾矢之的，周秀娜無懼亂箭，她說：「我冇感覺，當係宣傳一部份，但大家批評完，唔該都買本支持吓。」
Lavina崩潰狂哭
昨日又有網民在 facebook另開群組「反『扮反 o靚模曲線怪 isaac』大聯盟」，力斥 Isaac的立場搖擺不定，有逾百網友支持。
此外，另一 o靚模 Lavina昨日到銅鑼灣工作，獲途人上前不停替她打氣和鼓勵，近月她受壓的情緒立即崩潰，狂哭不停，她昨日說：「好多謝大家支持，我會繼續努力，做好自己。」
