傅穎和李蘢怡（ Tiffany）日前拜訪堪輿家麥玲玲，測虎年運程，麥玲玲批 Tiffany難大紅大紫；傅穎則自命天生惹小人是非，麥玲玲算出她宜譜異地情緣。
踏入虎年，不少人都趁着新正頭預測來年運程，傅穎和李蘢怡日前拜訪堪輿家麥玲玲，求教虎年吉凶。去年傅穎事業愛情皆失意，是非纏身離開前公司，轉投星皓，問她會否求神問卜希望逢凶化吉？她說：「我有個師傅講啲嘢好準，知道我舊年好大鑊，佢話因為舊年我 24歲轉大運，所以一切都會好差，𠵱家我反而唔想知咁多。其實我天生易惹小人是非，因為有啲嘢係你點都避唔到，可能就算我匿喺屋企，啲嘢一樣會飛埋嚟，既然係咁不如順其自然。」
話雖如此，但傅穎甫見麥玲玲即想知來年姻緣運，麥玲玲預測她虎年姻緣運相當不錯，有機會結識不俗的異性，大有發展可能，麥玲玲說：「傅穎嘅命格配異地緣，男方最好唔喺香港，同埋要大過佢八至十年就最理想。」不過傅穎透露媽咪不知何解想她和年紀小的男仔拍拖譜姊弟戀。
Tiffany被麥玲玲批若要在圈中大紅大紫似乎難以達成，不過仍有工作機會， Tiffany坦言希望抓緊機會搵大錢，她說：「你問我想搵幾多錢，我又冇定下目標，不過我今年 28歲，我想喺 30歲時再發展一啲新嘢。」
問 Tiffany被批不能大紅大紫，會否覺得心灰？她笑說：「我好同意喎，所以唔會失望，唔做明星咪做第二樣，一切都係自己掌握。」
