新一屆港姐已經接受報名，前晚陸詩韻、劉倩婷和華姐出身的苟芸慧等悉心打扮宣傳。發福不少的苟芸慧穿上透視裝，明顯有逼爆感覺，不過驟眼看卻有點像鞏俐，她表示希望勸服身材更有睇頭的妹妹出戰港姐。

一班應屆和前港姐包括劉倩婷、陸詩韻、張嘉兒、周家蔚和周美欣等，前晚到尖沙嘴宣傳新一屆港姐，華姐代表苟芸慧和陳爽也有現身撐場，部份靚女穿回當日參賽的戰衣。由於今年港姐將到印度拍攝外景，故此劉倩婷穿上甚有印度色彩的晚裝亮相。



「佢身材仲勁過我」
事隔多年，部份靚女身材難免有點走樣，當年有翻版林熙蕾之稱的苟芸慧身材發福，穿上透視晚裝時明顯有逼爆感覺，但幸好靚樣搭夠，驟眼看反而有點似年輕版鞏俐，她笑說：「吓，當然係人哋靚啲，我都好想有一日好似佢咁有女人味。」
今年港姐參選資格放寬了，除了年齡上限降至 28歲外，手持「三粒星」身份證的女士皆可參加，苟芸慧認為這是好事，並坦言有意推薦妹妹參加，不過她說：「佢身材仲勁過我，個樣 cute啲，好似日本妹，佢性格天真啲，認為唔需要憑選美證明自己實力，所以我都唔會勉強佢，但都會再同佢傾吓。」

陸詩韻之前表示會退出娛圈幫爸爸搞生意，前晚她收斂性感，並笑言留給新人騷本錢。陸詩韻坦言星途或多或少受緋聞影響，她又苦笑說：「我係中女，初時都好抗拒俾人咁叫。」
同場的劉倩婷穿起甚有印度色彩的晚裝，身形瘦削的她雙峯卻出奇凸起，但她堅稱沒有做任何手腳，只是戴上普通胸圍，反而周美欣的服裝是全場最性感，但身材平平，故全沒睇頭可言，不過她聲稱絕不介意。