原帖由 EternitY 於 7/7/2006 05:12 AM 發表
多謝GallantChief兄賜教！
請問，美國賽馬的環境，對其前景是樂觀嗎？:ttt:
先講美國賽馬環境．若以賭博，科技或其他不太屬於「馬」之範疇，或者未必及得上香港；但一講以馬為本，專業賽馬方面，發展當然完善得多．箇中有好多趨勢現象，例如：入場率及投注額下降，新一代馬迷減少，博彩稅例革新等，亦已經比香港早三，四十年經歷過．但此間馬圈環境屬商營，窮則變變則通，汲取教訓轉危為機早已成馬場主政管理生存之道，至今亦不當為何等大事．
而且最重要一點：美國跑馬，不單止係為馬場上面，大家都知，幕後仲有一個可以喺國際市場呼風喚雨嘅育馬業同大量相關嘅專業人才，呢個先至係美國馬圈永不動搖嘅基礎．肯塔基依然係全球育馬拍賣之都，每年市況之淡盛已久被視為國際育馬市場指標，另育馬業本身亦已佔去全州份七至八成本地生產總值，屬於當地經濟火車頭，重要性可見一班．
至於美國賽馬前景，現時應屬審慎樂觀；起碼八，九十年代，育馬市場由瘋狂炒賣中突然「硬著陸」，馬圈吹淡風嘅時代已經過去．
走出來嘅教訓：養馬成本只會一直暴升，跑馬始終會係一門只有少數有錢人先可以負擔嘅蝕本玩意；要封呢道蝕本門，又不能節流，惟有開源－仲一來要「多源」，二來不論風吹雨打，一年 365 日長開長有嘅一類「水喉」，先可以供養番賽馬業呢隻「大花筒」．
現時美加馬場嘅日常收入，大部份已經靠賣轉播訊號（simulcast）俾其他馬場，賭場或甚至於海外作分佣，由單靠入場經營變成旺家互惠嘅聯營模式．所以就算馬場今日倒轉「旺財不旺丁」，到大賽日先見人山人海嘅場面，財政方面反而更穩步上揚．加上科技資訊日新月異，馬圈可以藉此新猷去發展年輕一代市場，而呢批新客嘅特徵往往係「電視一代」，唔慣親身入場睇馬．譬如發展網上合法受注直播，全美加利用 NetPricing 技術，將統一彩池（Common Pooling）普及化等等．另外新一代馬場模式，則更於看台內部增加賭場（Racino），唔駛受制於馬季賽期，希望全年在人間，變相可以吸引同穩定人流，鎖住一班長客．更甚者，已經有馬場將戶外停車場中，平時多出或已經較少用嘅地皮再擴建做大型商場食肆，連鎚進軍銷售，物業及租務市場，長線收入更加可觀．
當然，美國馬圈今日依然面對好多其他問題，例如馬圈缺乏中央管理，馬場之間惡性兢爭，藥例凌亂等；但以上只屬馬圈內務．歸根究底，對外首先要去認真吸引番主流社會去長期關注，現時可謂萬事俱備，只欠東風：一匹
家傳戶曉嘅無敵馬王，甚至係三冠王．小弟以前喺不同媒介亦解釋過：賽馬屬於職業運動，而美加攪職業項目好怪，一定要個體化，捧偏像，做英雄，先可以流行．「雪茄」十六捷，「百寶龍」今年斷腳，甚至每年三冠季節狂賣故事，吸引力可一刻但不可一世 - 好多時甚至將整項運動嘅形象喺全國觀眾面前孤注一擲．但馬圈本身其實賭唔起之餘，往往更「一鋪清」：兩關在手，尾關輸短馬頭，甚至今年... 觀眾無非想睇完美結局，慘情戲睇得多都無癮．打籃球，大家一定惗起佐敦，現時假假地都仲有個「大帝」；衰到打哥爾夫球，今日都仲有隻老虎，個個update之餘都叫做家傳戶曉；跑馬呢？嚴格來講，到今日依然係「秘書處」，其他馬大眾少研究，係要長期賭馬嘅人先留意，而當中好多又係退休一族… 都已經 33 年前嘅事，到今日又點可以哄動？
[
本帖最後由 GallantChief 於 7/7/2006 11:10 AM 編輯 ]
