既然E主席講開已經退役o既好馬，我都想講一隻。
我對於北半球PP開始自行探索，應該始於實業家。當時第一次用Racing Post個Database去搵o既馬，就係呢一隻。
到後來，開始摸熟個系統，自己順勢就開始研究到港o既北半球PP。當時，小弟叫做第一匹「省招牌」之作，就係「實業先鋒」！
「千軍萬馬中能夠殺出重圍，就係好馬！」
話說千禧年，當時歐洲馬壇仍然處於名駒輩出之時代，而當時暑期版馬經，好多時都會有外國賽馬消息，或者係練馬師o係邊度買到爭奪下年打比o既PP新聞。
當年9月，簡Sir幫實業系買到一隻PP返o黎，報紙自然有訪問及報導。報紙就話呢隻馬o係光榮古活賽期一場G3(哥頓錦標)，輸俾當年聖烈治冠軍千禧駿驥得第三。不過後來簡sir話買呢隻馬o既原因，原來係呢隻馬o係一場22匹馬上陣o既二班賽中贏馬，所以先至買佢返o黎！簡sir話：「如果一隻馬能夠o係千軍萬馬中殺出重圍贏馬，鬥心、實力一定係好！實業先鋒咪就係咁買返o黎囉！」正正因為呢句，後來研究北半球PP之時，簡Sir呢個格言就成為我揀PP o既重要因素！
*事後，呢場佢擊敗o既Medican，後來於01年贏兩場G1，包括日蝕大賽！
當時o既我，走上去Racing Post睇呢隻馬個績o個陣，直覺上覺得此駒實力一定非凡品，更認為此駒有名駒風範，所以就同身邊識馬o既朋友講：呢隻下年打比實係佢贏！當然，朋友只覺得我傻傻地！
鋒芒初露，盡顯名駒風範
後來，此駒命名為「實業先鋒」，而來港第一場賽事，就係01年董事杯！當時對住顛峰o既「靚蝦王」、未被發掘潛藏o既「電子麒麟」、及時不我與o既「億銘之駒」，再加上路程不會，輸係好自然o既事！
之後，此駒降級跑一場一班1800米賽事。雖然狀態叫做比上次好o的，但面對一群甚惡、以及當銳o既一班好馬，大家都唔覺佢有何機會，難怪臨場成為24倍冷門。
不過，呢場佢跑到個第三！
跑完一場第三後，評磅員加佢四分，達到102分。但要入選打比，始終贏一場先至可以證明一切。不過，佢來港第三場賽事，簡sir卻跳級跑一場惡馬甚多o既三級賽-----百周年紀念銀瓶。
呢場雖然係三級賽，而且只得7隻馬，但卻惡馬雲集，既有當時銳氣正盛之駿仕、告仔當年爭打比分子加利寶、更有老馬王原居民在陣，但此駒縱然配上易根，仍然係2.2倍o既大熱門。
當時頭半段戰況頗為平淡，直到轉灣之際易根已經拉出三疊，而原居民亦已經佔先。但入到直路，易根只係開兩鞭，成隻馬好似法拉利上身，以驚人加速力過o左原居民，就算後面駿仕及加利寶點追都冇辦法收窄距離！結果佢以2 1/4馬位，輕鬆勝出呢場G3！
我雖然o係電視度睇住，但我已經俾呢幕場面嚇親！因為佢來港第三場，就已經顯露實力，仲要以驚人姿態勝出！所以當時已經知道：我o既估計已經o岩o左一半啦！:fff:
*未完，侍續！
[
本帖最後由 Running 於 22/10/2006 10:37 PM 編輯 ]
