筍盤益你﹕方嘉柏開鑼日例贏
筍盤益你﹕方嘉柏開鑼日例贏
方嘉柏喺○三年馬季開倉，首季即交出四十四場頭馬，仲試過喺○四年一月嘅沙田賽事贏五Ｗ，跟住兩季分別贏四十同四十七Ｗ，表現相當穩定，而到咗上季仲以六十一場頭馬登上冠軍練馬師寶座，當中曾喺十一月十九日憑「多樂寶」、「叻百利」、「卓越成就」同「時分秒」一日四捷，練馬生涯絕對可用順風順水嚟形容。
其實自從馬季煞科之後，斑尼已陸續同大家傾過唔少馬房嘅搏殺手法同埋佢哋嘅強弱項所在，不過點解咁遲先講冠軍方嘉柏呢﹖原因好簡單，事關佢上季出馬五百八十八次（多過排練馬師榜第二名嘅蘇保羅一百九十二次），跑得咁密兼啲馬唔理冷熱都搏，換句話講即係冇路可捉，搞到有時仲會畀佢啲下風馬殺埋﹔不過上季搏得咁盡，今季點捧方廐馬先係最啱時機﹖
根據資料顯示，原來方嘉柏從練四季以嚟，每季例喺開鑼日贏馬，首季以「更叻仔」食頭胡，第二季贏「紅玫瑰」同「星運爵士」起孖，第三季爆十五倍「出奇」食尾胡，上季就憑「星運才子」保持優良傳統，所以你話今季開鑼日又點可以唔吼實方廐馬﹖仲有一點值得留意，就係方廐上季同摩廐串十一次Ｑ，亦係所有馬房Ｑ中開得最多嘅組合，既然大摩上季喺五月贏六Ｗ（上季摩廐贏馬最多月份），而方嘉柏亦有五場頭馬進帳，如果兩廐搏殺攤路冇變嘅話，咁季尾嗰陣記得多啲吼實方摩Ｑ。
【斑尼】
| 
