【練馬相馬】梁定華
有情風再鬥千杯豪情
駕聖嫡愛捧位置Q
最近有朋友打電話給我，他首先叫我不要動氣，因為有官方的代言人（官方公仔箱評述員及常常自認係某已故馬評家的徒弟），說有過氣馬圈中人爆馬會料。
我朋友說那官方代言人所指的是我，叫我小心說話，不要像斯諾登要亡命天涯。
我不單止不擔心卻反而感到很高興，因為有一個資深的評馬人都看我的小框框，我不是感到開心麼！不過狗口長不出象牙這句說話亦無乜錯。以宗教傳統去處理便是「以牙還牙，以眼還眼」吧。我目前寫的都係事實，而且是站在馬迷和投注人立場來講說話，討公道。如果無做過又無做錯，又怕乜人爆呢？要爆料之話，都要嗰個爆料人係有料先得嘅，爆唔到料，都係一句講晒「無料」囉！咁想爆都無得爆啦。
千祈唔好幻想自己是個圈中人，如果缺乏圈中人的實際經驗和真正曾經參與其事者，咁又點算係呢！？只能用「側聞」或者我猜我估這些字眼來寫，我最不喜歡拉人裙冚自己腳，做人要有自己的風格。我梁定華隨時可以站出來同任何一位圈中人士辯論，講一下事情真偽，我已是退休人士，當然不及斯諾登那般偶像化；隱惡揚善，只怕那些惡人連半分善行也未做過，那麼怎樣去揚呢？我依家唔係打馬會工，彼此立場不同，我唔會再做鵪鶉，係事實就講囉，幫惡人隱惡者即是助紂為虐。
我以往做練馬師時，投訴和譴責我的FILE（檔案）幾呎厚，皆因我做人講宗旨，不會買人怕！我唔會過埠仔做練馬師，我亦唔係靠寫稿寫貼士搵食，《新報》老總唔想我食飽就瞓，成日都係打麻雀、跳社交舞，咁後生就咁頹廢（宜家社會65歲都仲好後生，哈哈）。給我一個角落，想講乜就講，想寫乜就寫。就算將我的稿費先用來賭晒馬，唔中就無糧出，中咗才有錢收都得，係咁牙擦架啦，唔啱大家一齊攞份糧出嚟賭番鋪先講。不過第二次世界大戰時的軸心國日本，與當時敵對的同盟國美國，今天不是一樣是盟友聯手箝制中國嗎！
今日第三場第五班1600米草地，「千杯豪情」上仗（56場）走勢進步，末段衝刺令人咋舌，雖然加咗6磅，但檔位內移至排第三位，除非係用陰謀論去諗佢，否則仲係有機會贏。「文武精神」上次已經同「千杯豪情」交過手， 而且全程處於較佳位置，但末段卻全無招架之力，我唔排除佢今場仍有一爭之力，但要贏則需要靠運氣搭夠，對手失誤才可以。「開心凱旋」上仗亦係同上兩駒同場，當日所處形勢甚為有利，但都係只能夠跑第七名，該場賠率有6.3倍，為乜會咁高估呢，今次杜利萊唔跑都係咁先啦。
「明民天下」9戰只跑過一次第三，今場形勢一般，但因配個莫雷拉就必然會成為熱門之一，我橫睇掂睇都唔覺佢有冠軍相。「有情風」上仗又係與「千杯豪情」和「文武精神」等同場，雖然只跑第二，亦走勢不俗，今次排位比上場好，若按照上仗彼此之間的末段走勢去衡量，佢未必能反先「千杯豪情」，但講騎師的鬥志和馬匹演出之準繩度，我賭佢WP。
