War Emblem 十七歲高齡先做東方不敗
http://racing.on.cc/news.html?id=20160301150752
馬匹通常都會因為練馬師唔想因為佢諗太多嘢而影響競賽能力，一早就會拎咗佢去做閹割手術。不過02年美國兩冠王「戰爭標誌」，竟然臨近20歲先畀人捉去閹，到底因乜事臨老都咁唔過得世呢？
話說「戰爭標誌」因賽績出色，日本社台集團03年不惜以1,700萬美元購入配種權，於日本開展配種事業，直到2012年退休。而佢咁早被淘汰嘅原因，唔係因為佢有生理缺陷又或者配種成績差劣(有兩匹產駒勝出G1)，係呢匹馬竟然一反常態，對異性動物興趣缺乏，配種意欲極低，投產9年以來只係得約120頭產駒。以一隻出名種馬一年平均配250隻計，佢加埋連人地一半都冇，對於社台嚟講當然係失敗投資。無計可施之下，唯有上年運佢返美國養老。
以為佢返家鄉後可以隨心所欲遠離女色做和尚？咁又未必。原來根據美國政府檢疫法例規定，由外地運返嘅退役種馬，必須要同雌馬進行交配試驗，以確保佢唔係馬傳染性子宮炎帶菌者(流行於馬匹性病)。可惜「戰爭標誌」真係完全唔爭氣，等咗一個月都未能成功交配一次。為令佢可以順利留美國頤養天年，牧場方面決定痛下決心將佢閹割變公公。「戰爭標誌」雖然已經17歲，好彩根據照顧佢嘅人士透露，可能因為佢係大胃王，從未因手術影響食欲，所以康復進度出乎意料咁好。不過唔知係咪因為太專注食嘢，令佢對其他所有嘢都興趣缺乏呢可...
[ 本帖最後由 馬佳善 於 2/3/2016 03:22 PM 編輯 ]
|
