何佩瑜（Jeana）憑一對34D人造不倒胸及一張得勢不饒人的寸嘴，成功於香港o靚模界站穩腳，難得她敢露又肯做，於即將上映的音樂偶像電影《起勢搖滾》亦見其蹤影。眼見做到殘的「賤娜」密密搵埋唔少私己錢，睇落相當疏乎，不過有苦自己知的她，卻向記者深情剖白對人歡笑，背人垂淚的淒酸故事：「其實我好辛苦！我唔知自己喺度做緊咩！」一泡眼淚於眼簾內上下滾動，睇落真係有幾分淒涼。
宇宙最寸嘴的o靚模何佩瑜（Jeana）貴為周秀娜師妹，去年搏到盡，谷行招牌「血管胸」即時殺出一條血路，人氣遠拋離其他o靚模九條街之多，旋即引來多個廣告商及電影公司垂青，獲接拍多部偶像電影如《婚前試愛》及《喜愛夜蒲》等。
盼覓得好歸宿
訪問間提到事業開始上軌道，有甚麼人生大計時，她坦言：「早前去內地拍戲時，我成個人完全Get Lost。拍完戲返房休息時我大喊特喊，因為我完全唔知自己喺度做緊咩，其他人有生活有朋友有屋企人，但係我就只係不停做嘢瞓覺，For What？究竟我做緊咩？我覺得好孤獨好辛苦。」鏡頭前永遠寸寸貢的Jeana，夜幕低垂時經常獨自瑟縮一角飲泣，認真我見猶憐。
女人始終要搵個好歸宿，事業正在搏殺期的Jeana直言十分恨嫁，問到有否追求者時，「同對上一個男朋友分手之後，我叫自己Open啲，嘗試同多啲唔同嘅異性出下街，而家同其中一個追求者發展得幾好呀，相信會發展成為情侶。佢教識我好多嘢，教識我點樣享受人生，佢帶我去做義工，得閒又同我去踩單車、跑步，佢令我知道咩係簡單是福，其實個個女仔都想結婚㗎啦，可以的話，我想喺26至28歲左右。」恨嫁恨到出晒面，帶佢去做義工嗰位追求者，識做啦！
