頒獎禮今年改制玩直選，視后已傳出將會是楊怡和徐子珊之爭，可惜徐子珊近日被指《雷霆掃毒》的賣點輪姦戲「吹大咗」，楊怡熱門位置再度升溫，但近年被指愈來愈扮大牌的她，日前為新劇《仁心解碼II》跟黃智賢拍攝外景時，囂上腦拍完即走，懶得親民向粉絲拉票，似乎當正自己攞梗視后咁喎！
台慶劇《名媛望族》突出表現，被指有望首度問鼎視后寶座，雖然有指徐子珊有機會憑《雷霆掃毒》「毒后」一角，成為攔路虎，但由於徐子珊一直吹噓為了一場輪姦戲，精神大受困擾，怎料該場「重頭戲」近日播出，原來只得一秒鐘咁大把，徐子珊大熱位置即時降溫。
擺羅仲謙上枱
近年愈紅愈囂的楊怡，雖然早前有指她為博攞視后榮譽，竟然利用男友羅仲謙賣身無綫來交換，但既然知道現在徐子珊不再是對手，諗住自己坐定粒六做視后，就算明知今年玩直選，亦覺得唔使再落力去拉票，日前她為新劇《仁心解碼II》拍攝外景時，串爆性格即時現形。
當日楊怡和黃智賢在元朗大馬路警署附近的車房拍攝外景，被大批粉絲圍觀，其間「準視后」不停俾粉絲影相，已露出唔多耐煩樣，拍咗成個下午終於收工，去年奪得「最佳男配角」的黃智賢，即時跟等了良久的粉絲合照，相反楊怡換完衫即時閃走，驚死粉絲會食咗佢一樣，完全當粉絲無到。
