剛度過30歲生日的宅男女神賈曉晨發瘟，搭上大自己十年的已婚中佬樊少皇，孽戀轟動全城，難得當事人仲好迷，開口埋口理直氣壯，唔知內情仲以為勾人老公係最啱，件事搞到咁大，TVB都冇表示？無他，殼王上場揸旗，有人水鬼升城隍，繼續孭飛演新劇《好心作怪》的JJ，上星期更大膽拖佬入廠開工，有傳當晚有人嫌對手袁偉豪戲屎阻收工，樊少皇即出面怒插，就連導演、燈光亦受牽連，人人有份受訓，袁偉豪被問及此事時，無奈回應：「前輩畀意見都會接受！」
瘟仔瘟上腦，JJ為了樊少皇，甘願背上「小三」污名，「佢真係好愛樊少皇，但有點失控囉，完全唔理自己形象，同人爭老公，你估講玩？」知情者透露，孽戀通天後，JJ依然唔收斂，繼續去愛。
樊少皇教做戲
自恃有人撐腰，JJ直頭橫行TVB，上星期為新劇《好心作怪》趕工，更一連幾天拖埋「外人」樊少皇入廠，完全漠視TVB規矩，「嗰晚JJ拖樊少皇入廠，大家都好愕然，初時男方都坐埋邊靜靜哋，後尾可能等得耐唔高興，借頭借路話燈光打燈唔夠光，又兜口兜面插袁偉豪唔掂，走去教人做戲，講真，導演都無出聲，點到佢講嘢啫，不過當時當刻真係無人敢駁嘴，袁偉豪硬食。」知情者形容當晚氣氛僵，為息事寧人，導演只好快手拍完放JJ走。
袁偉豪：前輩意見會接受
被人當眾插爆的袁偉豪被問及此事，故作輕鬆地說：「無，無呀，唏，係有打招呼，我都唔敢阻佢哋啦，（係咪教你做戲？）咁前輩畀意見都會接受，佢係大師兄嘛，三哥都有從旁提點我，三哥人好nice又有型，JJ被我感覺刮目相看，好勤力！」至於屬「外人」的樊少皇現身無綫片廠，袁偉豪語窒：「咁都好夜啦，有時Artist助手都係咁，又或者屋企人未入過廠咪嚟參觀下囉，我真係唔知咁多喎，其實我OK接受人批評，大家都係想為件事好啫。」就此事，記者聯絡外事部曾醒明，「如藝人帶人入廠必要得監製同意，一般都不容許外人干涉劇組拍攝，會再向各方了解事件。」
