《一路向西》落畫多時，但男女主角張建聲（Justin）和Celia K.（郭穎兒）的緋聞始終沒完沒了，日前兩人再在微電影《女生公寓》中合作，在西貢拍攝外景時，兩人全程打情罵俏，旁若無人，其中一場在碼頭的錫錫戲，兩人表演相當熟練，Celia更坦言事前不用溝通同做準備，話兩人無嘢真係搵鬼信囉
當日大清早九時許，攝製隊就到了西貢碼頭附近進行拍攝，由於前一晚Celia和Justin分別到了內蒙和江門打碟登台，兩人本來都很倦，但為了拍攝有好效果，都打醒十二分精神開工，不過休息時間，這對緋聞情侶仍不忘黐到實玩。
食完中午飯，攝製隊就會轉到早禾坑碼頭拍攝當日的重頭咀戲，問兩位當事人要不要事前做準備，Celia和Justin都異口同聲，相當合拍說：「唔使啦！（啱啱食完飯喎？）唔使㗎啦！」以為兩人講吓笑，估唔到女導演聶凌擺好機位，兩人話嚟就嚟，連香口膠都無食過，果然熟不拘禮。
不信戲假情真
事後問Celia拍攝感受時，她坦言有了第一次經驗，今次跟Justin都更有默契，「嗰陣連朋友都唔係，一嚟就要拍啲激情戲，真係好尷尬㗎！相對於上次，今次真係小兒科，唔使咩準備，連傾都無傾過，真係有啲似老夫老妻咁，不過拍戲還拍戲，同現實要分開，我唔會相信拍戲建立嘅感情，過一排唔見都掛住佢先算啦！」
