周秀娜算係咁，男友Avis偷嗒嫩模Vivian洩牀照也只係極速斬纜，沒有公開數臭對方，「男人係咁㗎啦，呢啲（牀照）時間性已經唔重要，我對佢已無感覺！」那被指介入方力申戀情又點睇？「小方係追我呀……喺部戲入面，同小方係好兄弟，如果真係咪亂倫？」有冇機會發展？「哈哈，其實我仲好期待下一個伴侶。」娜姐笑得風騷。
憑32D魔鬼身材成為宅男女神的周秀娜，入行彈得起即帶摰髮型師男友Avis做模Art，倆口子拍住上出活動接job，有錢齊齊搵，惟女方事業爆住上，彼此距離愈拉愈遠，29歲的Avis花弗成性，周圍辣女，前年被踢爆陪傅穎抱狗求醫，去年又跟媽模Mia拍牀戰撻着，緋聞精采過工作。
不存在「女尊男卑」
直至上個月，Avis被發現偷嗒19歲嫩模羅彩玲（Vivian），夜蒲後再拖返馬鞍山寓所過夜，圖文並茂無得賴（Vivian開記招否認，見另文），Avis索性唔拆彈，半句解釋都無，令身在內地的周秀娜爆喊，「睇相就知有嘢，娜娜忍唔住喊，覺得Avis無得救，其實大家知咩事，Avis貪玩到死，耐不耐就有人報料，娜娜都一直扮無嘢，拖住先。」知情者說。
對男友徹底死心，娜姐回港後即高調宣佈分手，「不嬲都存在問題，係大家一直拖唔想面對，女尊男卑？我出身唔係好富貴，只係好努力朝住目標進發，一步一步去追尋自己夢想，已盡量不令身邊人有壓力，今次返港大家商討後，翌日就話畀大家聽，都分開了，我對佢已無感覺！」
激讚小方玩得埋
別了Avis的同時，又彈出個方力申，「小方係追我呀……喺部戲入面，其實大家都知拍劇相處時間好長，大家年紀相若就玩得埋啲，佢當我男仔又成日整蠱我。」至於被指因介入小方戀情，激到正印Stephy買醉爆喊，她說：「其實感情係兩個人的事，希望佢哋無事。」
