由佐武宇綺、村田寬奈、吉井香奈惠、川島海荷和西脇彩華5人所組成的少女組合「9Nine」，日前來港參與《Kawaii PoP》音樂會演出。5名成員對於首度來港，表現興奮，除了可以跟歌迷近距離接觸，還有機會大歎港式茶餐廳美食外，更開心可以享受平靚正的按摩，趁機鬆一鬆！
9Nine作為少女組合，自然特別受男粉絲歡迎，當日在音樂會現場所見，果然有不少宅男捧場。她們坦言，相對於日本，香港男粉絲更熱情，更令她們開心，成員佐武宇綺還說：「我哋唔會嚇親，因為鍾意主動同熱情嘅男仔多啲。」
想同成龍合作
9Nine原來得知有機會來港後，早已搵定料玩番夠本，成員西脇彩華說：「我哋上網睇晒，知道去邊度買嘢，嗰日喺商場演出都有趁機會購物，買咗衫同袋，但係仲未有機會去茶餐廳，我哋想試食菠蘿包，另外最想就係去按摩，聽講又平又好。」講到這個話題5名成員即時起閧，要求翻譯哥哥代為安排。
9Nine表示這次來港演出只是個開始，希望未來還有機會來港發展，人氣最勁的川島海荷說：「我哋當然想嚟香港開個唱，但要睇歌迷反應先得。除咗演唱會，當然其他演出我哋都歡迎啦！譬如拍電影，最好同到我哋偶像成龍合作啦！我哋拍過殭屍劇，都識少少功夫㗎！」說罷5人即擺出功架，似模似樣！
