09年最上鏡小姐袁嘉敏（Candy）性格熱情又進取，前年因冧Laughing哥被處分，工作大幅削減，厭惡這種小圈子制度的她唯有往外闖，「簽TVB都四年啦，我又唔係想做陳芷菁，咁正氣為咩？其實我真係無底線㗎，只要劇情需要，露點都得！」Candy擁34D、23、34惹火身段，又唔介意露，相信要搵機會唔難。
因個樣生得似郭可盈，又有吳君如做提名人，袁嘉敏當年奪「最上鏡小姐」名銜，並簽TVB做足三年《東張西望》主持，至前年獲欽點轉型拍劇，在重頭劇《潛行狙擊》冧Laughing哥，憑牀戲冧功躍身成高登女神。但好衰唔衰，小三緋聞太震撼而被高層照肺，她的工作亦大幅被削減，上位花旦淪為串星。
說到這個小圈子競技場，Candy沒半點留戀，她說：「仍在拉鋸中，已到最後階段，自由身接Job無咁大掣肘，唔係話要大解放，只係唔明白點解係要我行陳芷菁條路，大方主持形象都玩了四年，係時候作出轉變。」
「我個胸真係幾大！」
想發圍，事必要離開TVB，擁34D、23、34惹火身段的Candy說：「我個胸真係幾大，條腰幾幼，視覺上就更突出，下一步最想拍戲，亦唔介意要裸露，好多法國影后都有露點啦，大家唔好有固定思想，唔好覺得露就係唔好，只要劇情需要，要我露點都得！唔趁後生露，唔通等到六、七十歲先露咩！」說罷，Candy便衝落沙灘嬉水作樂，瞓身配合鏡頭，每完成一段就走近攝影師睇相睇片，十分緊張。
