24歲林芊妤（Coffee）自「殘廁Gathering」事件後，知名度反而大增，轉危為機，有線電視用星級待遇力邀她倒戈指向TVB，吐氣揚眉唔使再做「二打六」！另外，因為瑜伽技術高超，好心人排隊雪中送炭，瑜伽Job多到嘭嘭聲，簡單出席商場活動，示範三兩招瑜伽招式便袋數萬，難怪Coffee現在出活動要請助手跟出跟入兼做保鏢！較以往在TVB底薪只得四千又要賣身，Coffee家陣因禍得福，月入逾五萬，「殘」出個未來！
Coffee一「廁」成名聲價十倍，全職教瑜伽的她決定封胸唔再行性感，因要建立番老師形象：「教瑜伽收一千蚊一堂，出埠仲收得貴，上次去加拿大就收一千蚊加紙一粒鐘。我打算考埋營養師牌，提供學員一條龍服務！因為做商場活動人多，我要請助手拎衫同埋隔開人群，但唔代表我升咗呢。」問到是否因禍得福？「呢個禍太大，單新聞係跟我一世，對女仔影響好大！不過，𠵱家喺街度會有人過嚟同我打氣，盡情享受呢個福，唔係可以點？都要繼續行落去。」
林知譽唔知藝人身份
她又自爆「趣事」：「有班學生見到我就叫我『殘廁Gathering』呀？原來我做咗潮語天后，真係勁！其實當時我錯誤解釋Gathering，我係想講同朋友食飯Gathering，唔係指喺殘廁Gathering，就係食咗幾隻字就變咗另一個意思。我同林生（林知譽）有保持聯絡，但發生咗咁大風波，我哋好難再行落去。總之現階段會做絕緣體，因為呢期行出街太受人注意，費事影響身邊人，其實當日林生只係知道我係瑜伽導師，根本唔知我係藝人，所以我累咗佢。」
性格低能透巾屬意外
Coffee堅持轉型做瑜伽導師，盡量唔接性感戲：「我唔係刻意洗底，只係以前冇得選擇，藝人係我正職，既然被安排做性感閒角咪做囉，我唔鍾意行性感，可能個樣好女人，大家認定我性感啫。識我嘅人就知道我唔鍾意博上位，我係大癲大肺男仔頭，上次喺公開活動示範瑜伽時下身不慎透出衞生巾護翼純屬意外，之前有人提醒過我要用衞生棉條，但我敏感度太低，仲話着長褲唔怕啦，咁啱綵排時助手影出嚟嘅相又冇問題，我個人真係好蝦碌，好低能，呢次失守又令我好唔開心，事後唔想睇報道呀！」
對於馬賽因艷舞短片形象插水同樣受靶！Coffee感同身受：「大家出少句聲經已係幫忙啦，希望件事可以盡快平息，作為當事人真係好難受，經歷過嗰段日子，體會到日子好難捱，希望佢都可以振作，?家處於過渡期唔好煩佢，等第日先打去安慰佢啦。」
