TVB綜藝節目收視告急，李思捷的《今晚睇李》被網民插爆抄美國名嘴節目《The Tonight Show》，不過因為冇代替品，就算收視仆直只得16點都有得添食。而大受男女老幼歡迎的魔術師甄澤權（Louis Yan）主持的《至尊街頭魔法王》有23點的收視，成收視救星，他坦承：「喺短短幾個月時間裏面要籌備、構思、設計、練習過百個創新魔術，仲要做道具，唯有自資過百萬組成團隊，集合台灣、日本、美國等地10多位魔法精英協力，因為時間唔夠，無法配合無綫添食要求！」
跟上輯只相隔8個月，《至尊街頭魔法王》又要走馬上任，不過今次節目就放在周一至五晚十時半播出成為主打綜藝節目，仲集中火力在百變的甄澤權身上，Louis承認有壓力，尤其是用舊魔術去挑戰自己的環節，真係好高難度，而籌備時間太短，所以只係做到10集，唔可能再添食：「為咗省時，我哋半team人出外景幫手拍攝，半team人要留低做準備，咁至可以應付得到，雖然係蝕住做，但藉住呢個平台做推廣，可以喺第二度賺返。」Louis坦言每次有節目出街，Fans層都會擴闊咗，所以希望每年做一次節目，下次可以衝出香港，如移師澳門取景大玩當地特色魔術，「去葡撻店變法，應該都幾有睇頭喎。」
撐Jinny表現夠真實
對於女主持吳若希（Jinny）被網民鬧爆做主持表現好煩，係又叫唔係又叫，集集都聽到無數次「好犀利呀！點解嘅？」，呢句說話已被網民視為15年煩音。Louis非常唔認同：「其實佢都做得好好，最初我以為佢cool cool哋，但埋位又係另一回事，佢好似小朋友咁真係畀到好大反應喎，其實事前佢只係略知魔術內容，唔會睇到預演，所以有呢個即時反應，我覺得好真實。Jinny仲好幫得手，拍攝時佢成日用合照為條件拉攏觀眾睇魔術，非常做到嘢。」
