馬國明與岑麗香自年前合作完《On Call 36小時候II》後曾傳緋聞，但已升為無綫頭號筍盤的馬明，又再一次得個吹字。最近兩人再度合作，馬明在無綫新劇《為食神探》奉旨力追香香，最終得手。日前兩人為該劇到旺角街市拍外景，劇情講述兩人被賣菜婆、賣魚佬掟菠蘿、龍蝦，身為「觀音兵」的馬明當然要做嘢，不惜做人肉盾牌為香香遮擋外來襲擊。
馬明在《為食神探》原本飾演廚師，但因太懶被炒後加入偵探社，被飾演記者的香香收作觀音兵，但拍攝至今馬明卻大呻「有得睇冇得食」，因為拍到𠵱家仲未有得同香香拍親熱戲。
馬明五金店涼冷氣
已向監製要求加咀戲的馬明未知會否先苦後甜，但日前他先嚐過苦果，事緣當日下午一時多，馬明一身私家偵探造型，着住恤衫西褲棉背心再加件大褸，打埋呔又戴帽去旺角街市拍外景，剛巧天氣回暖，加上街市人多，真係幾熱吓。馬明首先出場在街市大模施樣咁行，吸引大批街坊高舉手機拍攝，之後香香先出現，拍咗一陣兩人就返回外景車等拍下一個場口，馬明上車無耐又走落車行入一間五金店睇嘢，查實係停車要熄匙冇冷氣歎，佢着得咁厚重熱到標汗，乘機入人哋間店唞涼兼抹汗，出入期間就有途人向他「集郵」。
好戲在後頭，馬明歎完冷氣，就拍一場佢同香香遇襲嘅戲份，兩個唔知做乜得罪賣菜婆同賣魚佬，當街俾人掟菠蘿同龍蝦，都好揼本，仲要馬明唔用手擋，而係用人肉盾牌去保護香香，難怪馬明說：「要幾經艱辛先追到香香。」
