26歲的上位小花心穎BB，以好Charm笑容和33C激凸身材迅即成宅男女神。去年，碩士女神與雜食王李思捷合作拍攝《以和為貴》傳出緋聞，心穎BB更被影到送上門，在思捷何文田寓所徹夜纏綿。秘撻半年，多仔溝的BB原來已暗中移情，情傾一年約三十歲，高大貌似狄易達的斯文新歡。日前七夕節，BB仲低調和新仔去又一城食西餐甜蜜過節。中佬思捷被女撇，撞正其主持的節目《今晚睇李》收視見底就收檔，認叻王李思捷人財兩失，睇你仲點樣牙擦擦！ 採訪 ︰ 譚壹致
現年41歲的李思捷，恃住屋企有錢，自己有啲料就成日孔雀開屏，就算有個嫩口長腿model女友王寶寶都愛背女偷食，呢幾年先後同陳雅倫、胡杏兒和人妻萬綺雯等傳出緋聞。其中同姣Wing（心穎BB）嘅緋聞最堅，二人拍劇暗撻，黃心穎被發現任用思捷的七人車，收工後返回男方寓所玩通宵。
微博晒愛
食盡中青老女的李思捷，今次風水輪流轉，輪到緋聞女友心穎BB背佢會新仔。日前七夕節晚上7時許，心穎BB化淡妝架上眼鏡束馬尾，黑衫牛仔褲，好低調咁同一年約三十歲嘅高大斯文男去又一城Queen's Cafe撐枱腳。等位期間，看似撻着無耐的二人初時有點生疏，新仔全程雙手靠背，在大庭廣眾唔敢同女友親近，幾分鐘後兩人就按捺不住眉目傳情，然後互調冧笑，見女方甜笑未停過，就知有幾冧。之後兩人入餐廳，快食了半小時就火速離開，似有下場。再睇番心穎BB個人網誌，近日成日在網上晒愛，試過用手擺出「LOVE」字樣，又學陳妍希BB，單手擺出半個心形，似係同新歡隔空傳情。
《今晚睇李》收檔
心穎BB揀正七夕節會仔，睇嚟對戀情好認真。而佢舊愛李思捷近日就忙同黃智雯、陳煒等拍新劇《爸B有話兒》，其主持的《今晚睇李》因為平均收視只得17點（最低得14點），加上被指抄外國talk騷，思捷又無壓場感，令受訪嘉賓只能尷尬陪笑，將於9月27收檔。節目腰斬兼被女飛，慘成雙失！
