出道15年的黃又南拍過50部電影，每次都有機會同靚女合作，鄭秀文、陳慧琳，蔡卓妍同吳千語乜類型都有。在新片《燈塔下的戀人》中飾演賭場荷官的他，跟「富家女」鄧麗欣（Stephy）是一對，他笑指導演梁德森仲好益他，跟Stephy有激吻戲時，仲安排被鄭欣宜做人工呼吸狂咀，認真開心。不過，又南拍呢類埋身肉搏戲就好避忌：「每拍完一個shot我就會同對手講：『辛苦晒！』怕人誤會，唔好意思嘛！」。
對於跟Stephy合作，黃又南讚不絕口：「佢係好爽嘅女仔，每次我同佢講：『辛苦晒！』，佢就回應：『黐線㗎！』其實拍戲遇到一個好演員，好對手感覺真係好正，好深刻記得有啲咀戲冇乜feel，大家會商量點做，我同Stephy都提出要重拍多次，都係對件事好啫，再咀唔會有尷尬。不過，拍前大家要溝通清楚要點拍，俾人話鹹濕抽水就唔好啦。」當年出身自shine的又南同鄧麗欣屬同期新人，但一啲都唔friend，直至近年喺北京簽同一間電影公司成為同門師兄妹，大家合作多才成為老友，都算係遲來的「緣份」！
狀態好Fit
至於欣宜替他做人工呼吸，又南形容大家都笑住話好回味，諗起都覺得笑爆咀：「劇情話我遇溺昏迷，暗戀我嘅欣宜就撲住做人工呼吸，咀完後我忍唔住笑，搞到欣宜都偷笑。最初收劇本時真係唔知有咁多咀戲，點知不停修改，好益我啫！」之前又南憑電影《王家欣》奪「The Indie FEST film awards」影帝，他形容現階段狀態好fit，希望將來再有機會同女神鄭秀文、李嘉欣合作，他自爆瘀事：「有次我做Sammi個唱嘉賓緊張到講錯嘢，公開話：『好高興Sammi再可以上台喺台上演出！』其實我係想表達好開心佢又可以開演唱會啦。」
