日前，29歲生日的前港姐冠軍朱晨麗(朱朱)被周刊踢爆暗冧官二代，同前經濟發展及勞工局局長葉澍堃次子葉瀚華秘撻幾個月。日前，朱朱與娛圈好友在中環食飯慶祝，新仔無影，就由洪永城攝位上，臨時充當柴可夫司機，送上位女神朱朱和蔚雨芯返閨，洪永城仲幫少醉朱朱拎禮物和蛋糕，咁gentleman，唔怪得女友唐詩詠咁冧啦！
11年港姐冠軍朱晨麗，近年經常被傳忽然富貴，月薪二萬多元，14年豪擲七百萬買入將軍澳The Parkside的一個兩房單位樓花。又不惜以15萬月租，搬入金鐘太古廣場的栢舍服務式住宅，財來自有方。有指，她兩年前成功搭上電子大王劉紀明，分手後，今年就成功冧掂葉澍堃的兒子葉瀚華。
日前，朱晨麗29歲牛一，就相約圈中好友洪永城、翟威廉、蔚雨芯、巨胸人妻白雲和失蹤人口許亦妮等去中環食fusion food。食飽飽，一行人步出吹水等車。其間與朱朱同屆的港姐季軍許亦妮，亦有現身。自去年有傳許亦妮傾續約時，獅子開大口後遭雪藏，工作量變零。當晚激瘦許亦妮蒲頭，身形好薄，面削下巴兜兜，靚樣走晒樣。眾人分批走人，洪永城和壽星女與蔚雨芯行去取車，其間三人發現記者，有禮停步吹水，不過朱朱似有醉意，有點天然呆，聽到記者祝佢「生日快樂！」才識得彎腰講多謝。
