湯怡（Kathy）近日可謂雙囍臨門，除了首次擔正的英皇電影《某日某月》口碑票房雙贏，本報獨家消息，原來年僅30歲的Kathy去年底終於秘密完成置業夢，以約800萬購入將軍澳調景嶺一個2房2廳「上車盤」，新居現正裝修中，將會和家人共住。對於時下香港年輕人置業困難重重，她卻變身有殼蝸牛成為榜樣，湯怡唔敢認叻，帶笑說：「O依家買樓真係唔容易，要好努力同好努力先得，未來要供樓，我都好大壓力，打後幾十年乜機會都要爭取啦！」

英皇力捧藝人湯怡，早排主演新片《某日某月》叫好叫座，原來這位演技派八十後女神，趁去年三十而立已成功上車，全靠由工作第一日開始努力儲錢，再加一個慳字！Kathy開心分享說：「細細個阿媽就教落要儲蓄慳錢，唔可以搵幾多使咁多。買樓一直係我人生目標，下個目標係希望多買兩層樓，一間送俾媽咪，一間用嚟做包租婆。做人係要有目標，咁先至會有推動力。今次買到樓連屋企人聽到都難以置信。」

食住行都要慳

　　置業半年，湯怡形容樓奴心情係既驚且喜，未來生活上多方面都要慳住使，出入搭公車、買餸回家煮飯和少去旅行等等，她說：「我好師奶性格，最緊要揸磚頭，O依家買部二手車都要十幾萬，又要牌費、保險，好唔抵。」過往，湯怡因工作需要在天后租屋住，心目中的Dream House以舒適為主，傾向購買港島區三房單位，惜樓價持續飆升，去年在機緣巧合下購入將軍澳調景嶺二手樓盤，她說：「當時我親自走訪多區睇樓，將軍澳區都係心水選擇，因為將軍澳快將落成新隧道，可連接東區海底隧道，加強交通配套好有升值潛力，而且又近公司。咁啱業主要換樓趕住『出貨』，我就馬上拍板，所以買得比市價平幾十萬。我層樓喺半年間已升值十多個%，真開心。樓市有升無跌，如果我再唔趕入市，恐怕追唔切，好彩父母資助少少都順利過關，最重要通過銀行壓力測試上到會，按揭年期超過25年。(買樓唔預男友洪卓立？)我哋經濟一向獨立，所以同佢無關。」