溫馨小品劇一向都好受家庭主婦歡迎，好似兩年前由黎諾懿同李佳芯（Ali）主演嘅《BB來了》，劇集講述女強人突然要做媽媽，被逼放棄晉升機會，加上身體又出現變化，完全道出職場女性嘅心聲。無綫近日推出其延續篇《寶寶大過天》，劇集就講述新手父母辛酸點滴，不過主角就改為馬國明同岑麗香。劇集只係播出兩集，香香就被網民指佢演技浮誇同好嘈。
劇中香香飾演全職媽媽康雅悠，佢對囡囡游日童（梁芯語飾）照顧得無微不至，甚至連去廁所同沖涼都不敢， 第一集香香帶囡囡上「分離班」，佢聽到個囡爆喊，之後返到屋企仲多次被囡囡打面，情緒大崩潰。本應一班新手媽媽應該好有共鳴，點知網民就狠批香香演技及表情浮誇、得個嘈字、無端端勁高音大叫、嗰種神經質似係產後抑鬱，例如「香香演技好差，唔自然。」、「香香而家分離焦慮定產後抑鬱，還是個人精神緊張，搞唔掂。」、「b女好戲過香香，香香啲誇張面形扭曲就當自己演戲」、「香香D對白 表情 超趕客」、「得個嘈字」及「香香做戲又高音又成日增大雙眼，唔知做乜咁」等等。
另外，仲有唔少觀眾將香香同Ali比較，認為Ali演得比佢好，但亦有觀眾讚香香演得非常好，完美呈現新手媽咪嘅狀態又擔心又崩潰，表示好有共鳴。
