加入樂壇短短兩年的林峯將踩入紅館搶先舉行個人演唱會，前晚他出席在紅磡舉行的個唱記者會，大會安排四位比堅尼女郎即場向林峯獻吻，但他表現尷尬兼目不斜視，整個人更硬晒呆企在女郎之中，樣子趣怪。林峯透露個唱以水為主題，他將穿上透視裝和 T-back濕身上陣，大玩性感誘惑。
林峯近年演而優則唱，推出兩張唱片即搶先到紅館開處男演唱會，前晚他在紅磡開記者會，宣佈於下月 17和 18號在紅館舉行「峯情無限演唱會」，唱片公司人員及無綫高層樂易玲到場為愛將打氣，更有數十名歌迷撐場。
大會安排四位外籍比堅尼女郎在泳池現身，春色無邊，之後四位女郎先後向林峯送上香吻，甚至胸壓他的手臂，不過艷福無邊的林峯卻顯得頗為尷尬，目不斜視地呆企在眾女郎中間。
問林峯獲四位女郎送吻的感受時，他即苦笑說：「其實我唔知有咁安排，我只係知有四個模特兒，但係唔知有錫，睇個樣都係似臨時加插。」他坦言未開記者會前還似在發夢，當出席記者會時才發現夢想成真。
林峯也直言自己開演唱會似乎有點太快，但幸好唱片公司及無綫皆給他信心，認為他今年剛好入行 10年，已有一定基礎，故此林峯現在會加緊排練準備。
其實林峯真正流行的歌並不多，故個唱上他會演唱其他歌手作品，問到會否唱緋聞女友鍾嘉欣的歌時，他說：「我會考慮，我想畀大家知我平時鍾意乜嘢歌，而鍾嘉欣嘅歌我未知唱唔唱。」至於她會否現身擔任嘉賓，林峯則表示仍未決定，但謝天華、泳兒和蔡卓妍落實上台和他合唱。
預告跳辣身舞
由於演唱會以水為主題，問林峯會否赤膊上陣？他說：「意識上嘅健康，唔會刻意賣弄，當然唔會着泳褲，係體育館，唔係睇肉館。不過我會 see through，全個人都會若隱若現。」林峯更直認會穿 T-back上陣，更會和女舞蹈員大跳辣身舞，甚至可能有接吻動作，實行瞓身谷個唱。
