曾稱戶口只得雙位數的江若琳（Elanne）發憤圖強，因到內地密密開工搵人仔已變富貴，連日來她正積極學車，為三月初的路試而戰，要是一take過關的話，可望今年內「升呢」做車主。日前Elanne忙中偷閒，悄悄於深宵時間在銅鑼灣街頭學車，記者所見，膽粗粗的Elanne揸車好有天份，行車時十分穩定，絕非生人勿近那種，途人大可放心！
放下藝人身份的江若琳變身素顏學生哥，駕駛對她來說不成問題，尚算揸得穩定，唯獨泊位是Elanne的弱項，頭幾次泊位都不大順利，車轆不是撞到「雪糕筒」，就是上了石壆，泊位冇次成功，最終Elanne慘遭捱罵，教車師傅狠狠地要求她落車睇位，搞到Elanne面懞懞咁，今次真係明星都冇面畀咯！
渴望做車主
被指點後的Elanne唯有醒醒定定，全神貫注再多練幾次，苦練兩個鐘頭之後，最後成功泊位，總算交到功課，她才鬆了一口氣。師傅在嚴厲過後，都讚她有揸車天份，係女車手！令Elanne順番條氣。
Elanne是大忙人，經常不在港，故學車時間不多，現時僅學得四堂，距離考牌時間唔夠一個月，看來她要努力惡補了，所以她忍不住憂心忡忡：「我都預咗會肥佬，但係我真係好想考到牌，之前生日，有歌迷送咗個『LING 930』自製車牌畀我，車牌上係印住我生日日期，自己夢想擁有一部粉紅色車子！」
