許志安 與鄭秀文 （Sammi）情路兜兜轉轉，最近安仔坦承與Sammi復合，獲全城祝福，事業愛情兩得意的許志安，除愛情得到滋潤，演唱會亦大收旺場，今晚起一連三晚（5月27日至29日）假紅館舉行的《On And On 25周年演唱會》門票火速售罄，更掀起炒風至超過2000元兩張，大家無非想入場感受一下「安文戀」帶來的喜悅！原先無意加開part2的安仔，為咗粉絲荷包着想，唯有改變初衷。
為今個演唱會，許志安每日勤於練歌排舞、做運動和曬燈，Keep得一身結實肌肉，務求大家有煥然一新感覺。日前安仔一面練歌，大唱《唯獨你是不可取替》、《昨遲人》等經典好歌，更一面飲湯水補充體力，莫非是來自啱啱愛上入廚、天后女友Sammi的愛心靚湯？安仔聞言馬上哈哈大笑否認：「佢忙於拍戲呀，唔會啦，頭場會嚟睇騷。」至於演唱會中，邊part會同Sammi有關？
安仔不願多談，耍手擰頭說：「唔講啦，你哋入嚟感受吓啦，總之演唱會每個部份都有驚喜。」那會否趁25周年在台上求婚？安仔笑說：「不會！只知BIG 4班兄弟會有份驚喜大禮。」
每日忙到兜兜轉，安仔都累壞了，不過，眼見門票賣個滿堂紅，辛苦都值得。
對門票供不應求，令網上掀起炒風，安仔略知一二，他無奈道：「有歌迷好開心咁同我講，話用咗2000蚊買到頭場第五行飛，我就覺得炒風不可長，真係唔想歌迷荷包受損，但我愛莫能助，自己都爭人一身飛債呀，唯有重新考慮開part2演唱會啦。」
