做女人被指靠男人雖不算壞事，但生得靚又好學的Race（黃婉佩）卻唔多認同，所以對被指泊到大碼頭等做小向太，唔使做又可任買名牌的Race自然唔好受，不過，好在芳齡28的Race保養得宜，半隻腳已踏入少奶奶生活但依然Keep得到，向佐覺得嗒得杯落之餘，亦吸引不少廣告商垂青。日前，Race便再任現代美容纖體代言人，只需Show吓本錢，谷胸晒髀換4套衫便輕鬆收百萬，自己搵到錢，使乜靠男人。
Race的家姐，31歲的黃婉君 （Rosanne），前年12月嫁給混血牙醫男友Derek後，極速於去年成功造人，昔日的2R 已變晒質，一個為人母，一個等做人妻，不過，兩位朋友依然有市場，家姐陀B時便跟Race齊為現代出任代言人，跟一眾十八廿二的o靚模爭飯食。
唔靠向佐靠自己
目前正專心修讀工商管理課程的Race，趁開學前努力搵銀，除客串錢國偉執導的《喜愛夜蒲》外，更再次擔任代言人，「因為我上次替公司拍廣告，佢哋好好，一直支持我做機同做Facial，身型同皮膚都keep得好，所以我拍新廣告都無刻意減肥，今次得我一個做，因為家姐生完無耐，要唞吓先。」單飛依然有價，廣告商更讓Race參與服裝揀選過程，問到造型性感又要做夾胸等動作，男友向佐有否詐型，Race笑笑口說：「啲衫佢睇過晒，做咩佢都知，啲相佢都有睇㗎，總之我乜都同佢講，互相尊重嘛。」咁恩愛，隨時嫁得啦，Race即哎吔了一聲，「我唔係等嫁㗎，我仲想唱歌㗎，家姐生完，知道養小朋友唔容易，所以遲啲先諗結婚嘞。」
